Обвинителен акт против десетте лица за кривичното дело убиство од член 123 став 1 во врска со член 19 во врска со член 22 од Кривичниот законик, достави основното јавно обвинителство до Кривичниот суд.
Се работи за лицата кои на 27 април во Собранието го тепаа пратеникот Зијадин Села и како што се вели во соопштението на ОЈО „се обиделе да го лишат од живот.“
https://www.facebook.com/AlsatMTelevision/videos/463017257367834/
„Обвинетите сите заедно, како и со други лица за кои до овој момент не е утврден идентитетот, се обиделе да го лишат од живот оштетениот Зијадин Села. Дел од обвинетите користеле тврди предмети кои ги фрлале кон оштетениот и притоа му нанеле животно загрозувачки повреди. Останатите пак, со употреба на удари, клоци и тупаници го извршиле кривичното дело за кое се товарат“, пишува во соопштението.
Обвинителството поднело и предлог за продолжување на мерката притвор за деветмина од обвинетите, а за еден од нив предлог за продолжување на мерката куќен притвор.
„Обвинителството цени дека постојат законските основи за продолжување на побараната мерка за обезбедување, бидејќи постојат основи за можно бегство на обвинетите, за влијание врз сведоци , како и за довршување на кривичното дело за кое се обвинети“, наведено е во соопштението.
За настаните во Собранието, Села исказ даде на 25 мај. Тој реле дека нападот во Собранието врз пратениците и новинарите бил нарачан од политички функционери кои се обидуваат да го прикријат нивниот криминал.
„Го завршив мојот исказ за настаните кои се случија на 27 април. Реално, немаат потреба за целиот тој исказ зашто сè беше толку јавно, тенденциите беа толку јавни и нарачателите на атентатот се јавни политички личности, партиски претседатели коишто се подготвени на сè во обидот да ги скријат криминалот и корупцијата што ги направија сите овие години“, изјави Села.