Полициски час од 1 часот по полноќ до 6 часот наутро и забрана за музика во угостителските објекти во текот на целиот ден, што се воведоа во минатата недела на грчкиот остров Закинтос и во градот Ханија на Крит, се продолжени до 18 август, јави дописничката на МИА од Атина.

Поради влошената епидемиолошка состојба и зголемениот број нови случаи на ковид-19, а по препорака од надлежната комисија, Закинтос и Ханија од петокот се дел од црвената зона, кога беа воведени рестриктивните мерки до 13 август, а денеска се продолжени до среда наутро.

Од Секретаријатот за цивилна заштита на Грција потсетуваат дека забрането е, исто така, и организирање на секаков вид на собири со над 20 лица во приватни простори, во спротивно се предвидени казни од 50.000 до 200.000 евра.

Во изминатите 24 часа во Грција се регистрирани 3.605 нови случаи, починаа 20 лица, а 240 пациенти се приклучени на апарати на Одделите за интензивна нега во грчките болници.