Синдикатот на полицијата во Македонија (СПМ) бара неодложно обезбедување на бесплатни тестови за Ковид-19 за скрининг на полициските службеници, идентификување на асимптоматските случаи и мапирање на случаи на лица кои веќе го прележале корона вирусот.
„Како Синдикат неодложно бараме Министерството или Владата веднаш да обезбедат бесплатни тестови со кој ќе се врши скрининг и тоа по возраст и хронични болести кои би биле опфатени со испитувања во првиот период, а потоа и за сите други со цел да се види опфатеноста на полициските службеници со овој вирус, идентификување на бројот на асимптоматски случаи кои во голем број се присутни меѓу припадниците на МВР. Имено, истите се заразени, а не се свесни поради тоа што немаат симптоми, а од друга страна го пренесуваат на други лица, како и мапирање на случаи и лица кои веќе го прележале, а не ни знаат“, се наведува во денешното соопштение од Синдикатот на полицијата.
Од Синдикатот посочуваат дека до нив секојдневно стигнуваат информации дека во редовите на МВР има нови позитивни случаи, но и случаи во кои полициските службеници се сомневаат дека се заразени.
„Во изминатиот период полицијата не остана имуна на болеста, па бројот на болни и кај припадниците на МВР секојдневно растеше. Со оглед дека државата треба да се врати во нормален процес на функционирање, а процесот избори, кој опфати многу полициски службеници помина, со цел на спречување на појава на полициски кластери по сите овие активности, како Синдикат бараме веднаш да отпочнат скрининг тестирања согласно споменатиот план со цел спречување на ширењето на болеста помеѓу сите полициски припадници“, велат од Синдикатот.