Нова, шеста, причина за задоволство добија навивачите на ЖРК Вардар од нивните миленички во ЕХФ Лигата на шампиони. „Црвено-црните“ девојки славеа над Тирингер со 29:21 (полувреме 12:12) во последното коло од прелиминарната фаза во елитното натпреварување и на зимски клупски распуст заминуваат со максимален ефект во групата Ц од која ќе пренесат осум бода во главниот сегмент.
Бундеслигашот допатува во Скопје во редуциран состав со само девет ракометарки меѓу кои и двете голманки Краузе и Екерле. Но, тоа не беше проблем за тимот од Ерфурт да демонстрира германска упорност, посебно во првиот дел, пришто успеа во целост да му парира на македонскиот првак кој во два наврата имаше плус четири (10:6 и 11:7).
Нештата, сепак, дојдоа на свое во продолжение на средбата. По десетминутниот одмор Ирина Дибирова на терен ја испрати првата постава што набрзо почна да дава резултат. Вардарки се дадоа во резултатско „бегство“, со серија од 5:0 поведоа со 20:14 и не дозволија нималку надеж за враќање во живот на противникот.
Лакрабер со седум гола беше прв стрелец на натпреварот, еден повеќе од Лузумова, најефикасната ракометарка во поразената екипа.
Следува пауза во Лигата на шампиони што, пак, не значи и одмор за ракометарките. Последниот месец во 2017 година го носи и Светското првенство чиј домаќин е Германија, па добар дел од „црвено-црниот“ ростер ќе биде со репрезентативни обврски.
Враќање на клупските активности ќе има во јануари со натпревари од главната групна фаза во ЛШ. Ривали на вардарки во новоформираната група ќе бидат најдобрите три екипи од групата Д, а како такви на коло до крајот се Мец, Битигхајм и Будуќност.
ЖРК Вардар – Тирингер 29:21 (12:12)
Сала: СЦ „Јане Сандански“ во Скопје. Гледачи: 3.500. Судии: Георгиос Панаидес и Мариос Андреу (двајцата од Кипар).
ЖРК Вардар: Лејно, Мицевска, Суслина, Радичевиќ 6, Кликовац, Саздовска, Кузнецова 5, Лазович 2, Пенезиќ 4, Керамичиева, Чанаџија, Лакрабер 7, Хмирова 3, Цвијиќ 2, Петровиќ, Ристовска. Тренер: Ирина Дибирова.
Седмерци: 2/2. Исклучувања: 4 минути.
Тирингер: Краузе, Екерле, Шефкнехт 4, Мацуко 4, Шмелцер 4, Нидервизер 1, Лузумова 6, Јакубисова 2, Хубер. Тренер: Херберт Милер.
Седмерци: 2/2. Исклучувања: 4 минути.