Американскиот државен секретар, Мајк Помпео денеска во Доха изјави дека САД планираат проширување и реконструкција на воената база „Ел-Удејд“ во Катар. Според него, документ за таква намера веќе потпишаа првите луѓе на соодветните министерства на двете земји.
Помпео во Доха се сретна и со министерот за надворешни работи на Катар, Мухамед бин Абдулрахман и оцени дека односите меѓу САД и емиратот се „важни и се развиваат во добра насока“.
„Нашата база „Ел-Удејд“ игра клучна улога во борбата против Исламската држава“, изјави Помпео за време на неговата блискоисточна турнеja што ја почна на 8 јануари и ќе трае до вторник (15 јануари).
Во базата се стационирани 13.000 американски војници, а во нејзини рамки има и команден пункт на воено-воздухопловните сили на САД во регионот. Не се прецизира за какво проширување станува збор. Властите во Катар неодамна изјавија дека имаат намера да издвојат 1.8 милјарди долари за развој на базата. Блискоисточната турнеја на Помпео ги опфаќа Јордан, Ирак, Бахреин, Обединети Арапски Емирати, Катар, Саудиска Арабија, Оман и Кувајт. Американскиот државен секретар претходно го посети и Египет.