Три лоши минути на стартот на второто полувреме ги помрачија одличните 30 од првото и кумуваа на убедливиот пораз на Македонија од Шпанија со 21:32 (полувреме 12:13) во претпоследното коло во групата Б на Светското ракометно првенство во Германија и Данска.
Штета. Како поинаку и пократко да се опише дуелот на „црвено-жолтите“ со „фуријата“ во „Олимпијахале“ во Минхен. Македонија го држеше крај себе актуелниот европски шампион и му дишеше во врат, но дозволи лесно да ` побегне и покрај, дотогаш, извонредниот Никола Митревски кој едноставно го маѓепса голот. Шпанците направија серија од 5:0 по враќањето од одмор, од плус еден се одлепија на плус шест за „крај“ на средбата уште во 34 минута.
На селекторот Раул Гонзалез му стана совршено јасно во кој правец оди натпреварот, па стандардните ги повлече и на терен ги испрати помладите за акумулирање искуство и минутажа. Костурот на тимот ќе биде потребен за утре (18 ч.) за директната пресметка со Исланд која треба да го даде третиот патникот од групата Б во главната муднијалска фаза во Келн.
Жарко Пешевски за Македонија и Алекс Гомез за Шпанија постигнаа по шест гола и како најефикасни го завршија мечот. Кире Лазаров и Раул Ентрериос реализираа по пет, Филип Кузмановски и Даниел Душебаев ги тресеа противничките мрежи по четири пати. Никола Митревски забележа фантастични 15 интервенции, но неговиот колега на спротивниата страна Перез де Варгас го напушти мечот со наградата играч на натпреварот.
СП во ракомет (м)
Група Б, 4 коло
Македонија – Шпанија 21:32
Хрватска – Бахреин 32:20
Јапонија – Исланд 21:25
Табела: Хрватска 8, Шпанија 8, Исланд 4, Македонија 4, Јапонија 0, Бахреин 0.
Идно коло (четврток): Бахреин – Јапонија (15.30 ч.), Македонија – Исланд (18 ч.), Шпанија – Хрватска (20.30 ч.)
Група Д, 4 коло
Ангола – Аргентина 26:33
Унгарија – Египет 30:30
Катар – Шведска 22:23
Табела: Шведска 8, Унгарија 6, Египет 3, Аргентина 3, Катар 2, Ангола 2.
Идно коло (четврток): Египет – Ангола (15.30 ч.), Катар – Аргентина (18 ч.), Шведска – Унгарија (20.30 ч.)