Евгениј Поп Ацев ја оствари целта на годинашното издание на Охридскиот пливачки маратон. Тактиката што ја подготви за четвртата трка од светската гранпри серија во ултрамаратони на ФИНА му донесе резултат. Не победи во македонскиот туристички бисер, но и освоеното второ место беше доволно за преземање на врвот во генералниот пласман на две станици до крај на сезоната (Цриквеница – Нови Винодолски во Хрватска и Капри – Неапол во Италија).

„Мојата тактика беше да држам темпо со Рајмон Аксел, да пливам рамо до рамо со него и да бидам на подиумот. Имав сила за тоа и успеав. Задоволен сум од настапот во Охрид и среќен што избив на чело во генералниот пласман“, истакна Поп Ацев кој по четири трки во 2019 година има 230 бода, седум повеќе од Италијанецот Едуардо Стокино.

Времето со кое Евгениј Поп Ацев ја исплива 25 километарската рута од Свети Наум до охридското пристаниште беше 5:21:03 часа или осум секунди побавно од победничкото на Французинот Рајмон Аксел (5:20:55 часа) кој беше лауреат во Охрид и во 2013 година. Минатогодишниот победник Франческо Гетини од Италија го освои третото место со резултат 5:21:09.

Победничкиот венец кај девојките го доби Италијанката Аличе Франко која на целта пристигна со време од 5:41:15 часа пред Ерика Јенсен од Аргентина (5:42:31 часа) и нејзината сонародничка и водечка во генералниот пласман во женска конкуренција, Пилар Геихо (5:50:30 часа).