Со договор за меѓусебна техничка соработка кој лани во октомври го потпишале Агенцијата за вработување и Министерството за труд и социјала е договорено Агенцијата да му отстапи возила на времено користење на министерството, вели за НОВА директорот на Агенцијата Влатко Поповски.
„Во ниту еден момент Агенцијата за вработување не изјави дека возилата кои се предмет на Ваш интерес се отуѓени или дадени на трајно користење, туку истите се отстапени на времено користење согласно склучениот Договор за меѓусебна техничка соработка. Оттука, неспорно е дека сопственик на возилата е Агенцијата за вработување“, рече Поповски.
Од Поповски го побаравме на увид договорот, но тој ни кажа дека поради најавените кривични пријави нема да биде во можност да ни го даде.
„Најавени се кривични пријави и не знам колку е паметно сега да го дадам договорот. Во секој случај испратете вие барање на мејл, па службите ќе одлучат дали да се објави договорот. Можам да ви кажам дека договорот е склучен во октомври, минатата година и треба да го има во двете архиви“, рече Поповски.
На ова, министерката за труд и социјална политика, Фросина Ременски рече ни изјави дека дури и да постои ваков договор, ако е потпишан во време кога Спасов бил министер, сега како заменик нема можности да ги користи привилегиите што ги имал како министер.
„Таков договор во МТСП не постои, а ако Поповски има, треба да го даде на увид и јавноста да види за каков договор се работи. Во секој случај, и да постои ваков договор, ако е направен додека Спасов бил министер, тој повеќе нема можност да ги користи привилегиите што ги имал порано“, рече Ременски.
Според Договорот од Пржино потпишан од минатата година, СДСМ доби двајца министри и тројца дополнителни заменици министри во владата на ВМРО-ДПМНЕ.
Со овие промени, Спасов од министер, стана дополнителен заменик министер.
Новите функционери во Собранието беа изгласани на 11 ноември минатата година, што значи во октомври кога го потпишале договорот за меѓусебна техничка соработка, Спасов се уште бил министер.