Обезбеден е мир за Жозе Мурињо на клупата на Манчестер јунајтед за што најголеми заслуги има Ромелу Лукаку. Белгискиот репрезентативец беше двоен стрелец во триумфот на „црвените ѓаволи“ над Барнли со 2:0 во четвртото коло во англиската Премиерлига. По центаршутот на Алексис Санчез во 27. минута, напаѓачот најави дека трите бода ќе патуваат кон „Олд Трафорд“ за што издаде потврда во 44. со нова реализација по карамболот во домашниот казнен простор.
Јунајтед можеше и до поубедлива победа на стадионот „Туф Мор“ доколку Пол Погба беше прецизен од белата точка во 69. минута. Но, можеше да заврши и во комплетен состав доколку Маркус Рашфорд беше поприсебен во 71. минута во која доби директен црвен картон за удирање на противнички играч.
Манчестер јунајтед сега има две победи и два пораза во четирите одиграни меча во новата сезона во Премиерлигата. Мурињо, пак, може да здивне по притисокот што го има имаше за бледиот старт во шампионатот, а во негова полза ќе биде и претстојната пауза за клупски активности поради настапи на репрезентациите во Лига на нации.
Вотфорд со четвртата победа во четвртиот меч – со пресврт совладан и Тотенхем
Вотфорд, пак, продолжува со фантастичните партии во воведниот дел на англиското фудбалско првенство. По победите над Брајтон (2:0), над Барнли (3:1) и над Кристал Палас (2:1), со голем пресврт беше совладан и Тотенхем со 2:1.
„Спарси“ поведоа на „Викариџ Роуд“ со автогол на Дукуре. Несреќниот момент од 53. минута, сепак, не беше и одлучувачки во средбата. Тимот на Чави Гарсија заигра добри дваесетина минути во продолжението што го круниса со два гола. Израмнување донесе капитенот Трој Дини во 69. минута по асистенција на Холебас, а грчкиот интернационалец се најде во иста улога и во 76. минута во која егзекутор беше Кеткарт.
Вотфорд е со максимален ефект каков по четири кола имаат уште лидерот Ливерпул и Челзи.
Премиерлига, 4 коло
Барнли – Манчестер јунајтед 0:2
Вотфорд – Тотенхем 2:1
Кардиф – Арсенал 2:3
Манчестер сити – Њукасл 2:1
Вест Хем – Вулверхемптон 0:1
Евертон – Хадерсфилд 1:1
Кристал Палас – Саутемптон 0:2
Челзи – Борнмут 2:0
Брајтон – Фулам 2:2
Лестер – Ливерпул 1:2
Табела: Ливерпул 12, Челзи 12, Вотфорд 12, Манчестер сити 10, Тотенхем 9, Борнмут 7, Евертон 6, Лестер 6, Арсенал 6, Манчестер јунајтед 6, Вулверхемптон 5, Саутемптон 4, Фулам 4, Брајтон 4, Кристал Палас 3, Кардиф 2, Хадерсфилд 2, Њукасл 1, Барнли 1, Вест Хем 0.