Хрватските граѓани се повикуваат воопшто да не трошат в петок, а планирано е бојкотот да опфати платежни трансакции, угостителски услуги, сместување, превоз и достава.
Марија Тодоровска
Иницијативата за бојкот на маркетите започнува од Хрватска, а се рашири и низ БиХ, Србија, Црна Гора и Северна Македонија.
Утре, 31 јануари, во овие пет држави најавени се бојкотите како одговор на високите цени.
Хрватска
Во Хрватска Фејсбук групата „Ало, Инспекторе“ повика на првиот бојкот на маркетите на 24 јануари.
„На 24 јануари во Хрватска се организира бојкот против високите цени на храната. Се повикуваат граѓаните на тој ден да не купуваат ништо, апсолутно ништо. Подгответе се за тој ден како да е недела“, стои во пораките, се велеше во повикот.
Иницијативата, која потекнува од Фејсбук-групата „Ало, инспекторе“, зад која стои Европскиот центар за извонредност на потрошувачите (ECIP), доби поддршка од здруженија за заштита на потрошувачите, синдикати, политички партии, па дури и од министерот за економија.
По целодневниот бојкот на 24 јануари, граѓаните во Хрватска се одлучија за неделен бојкот на трговските синџири, Lidl, Eurospin и DM и три производи – Кока Кола и други газирани пијалоци, флаширана вода и детергенти за садови, јавија хрватските медиуми. Платформата повикува на целосен бојкот на три трговски синџири од четвртокот наутро до среда, 5 февруари навечер.
Исто така беа повикани и вработените во продавниците да ја забават работата за време на протестните акции
Хрватските граѓани се повикуваат воопшто да не трошат в петок, а планирано е бојкотот да опфати платежни трансакции, угостителски услуги, сместување, превоз и достава.
Босна и Херцеговина
А, по успешниот пример за бојкот во Хрватска, веднаш се огласија и граѓаните на БиХ повиќувајќи на бојкот на 31 јануари.
Бојкотот планираат да ги опфати продавниците, бензинските пумпи, кафулињата и рестораните.
На социјалните мрежи граѓаните на БиХ тврдат дека цените на храната во земјата се многу повисоки од во западните држави, а трошоците за домување се неподносливи.
Црна Гора
А, на 31 јануари и во Црна Гора граѓаните ќе бојкотираат.
Невладината организација Институт алтернатива за во петок ги повика граѓаните да не купуваат во продавниците и маркетите.
Можеме ли политиката да ја оставиме настрана еден ден, да не се делиме, сите да бидеме едно, да им покажеме дека ние сме тие што одлучуваат, се посочува во соопштението на Институт Алтернатива.
Организацијата наведува дека цените се екстремно високи и дека водечките трговски синџири ги договараат цените, поради што граѓаните да не го почувствувале зголемување на платите и пензиите.
Србија
Во Србија здружението за заштита на потрошувачите Ефектива ги повика граѓаните на Србија да ги бојкотираат големите трговски ланци в петок на 31 јануари.
Како причина за овој повик Ефектива посочи дека Србија има највисоки цени во Европа.
Ефектива потсети дека потрошувачите во Хрватска ги бојкотирале малопродажните синџири и со тоа ги намалиле приходите на тие синџири за дури 47 отсто.
„Време е потрошувачите да возвратат“, наведуваат тие во повикот.
Северна Македонија
Инцијативата за бојкот се прошири и кај нас. По социјалните мрежи граѓаните беа повикани исто така на 31 јануари да се воздржат од пазарување во маркетите.
Организацијата на потрошувачите на Македонија, иако не е организатор на овие активности, ги поддржува повиците за бојкот, особено што, како што вели нејзината претседателка Мирјана Лончар, граѓаните секојдневно се соочуваат со зголемување на цените на прехранбените производи.
За ова се огласија и партиите.
ДПМНЕ соопшти дека ја поддржува иницијативата за бојкот на маркетите и велат дека институциите ќе ги истражат сите злоупотреби. Додаваат дека нема никаква економска причина за зголемување на цените надвор од своеволноста на трговците, која тоа го оправдува освен голиот профит на грбот на граѓаните.
Од СДСМ, пак, оценија дека акцијата за бојкот на маркетите се прелева и кај нас бидејќи Владата не ги заштитила граѓаните од зголемувањето на цените.