Управниот суд ги одби и последните 23 тужби од „Левица“, откако претходно денеска истото го стори и со останатите 78 тужби од ова партија, информираат за МИА од Управен суд. Со оваа одлука, Управниот суд ги потврди одлуките од Државната изборна комисија (ДИК) и ги одби сите 101 поднесена тужба од Левица.

Тужбите на „Левица“ што беа поднесени до Управниот суд се разгледуваа на повеќе јавни расправи закажани во текот на денешниот ден. Освен по тужбите од „Левица“, Управниот суд за денеска има закажано јавни расправи и по тужбите од Социјалдемократската унија (СДУ), МОРО – Работничка партија и Демократи, чии одлуки ќе бидат јавно соопштени по завршување на расправите.

Две тужби поднесе ВМРО-ДПМНЕ и коалицијата „Обнова на Македонија“ и една „Единствена Македонија“ и коалицијата „Никогаш Северна, само Македонија“ за кои Управниот суд ќе расправа утре.

Претходно денеска од Управниот суд информираа дека тужбите поднесени од Интерга, Алијанса за Албанците и Алтернатива и едно физичко лице, се одбиваат како неосновани и се потврдуваат решенијата на ДИК.

„Заклучно со ден 22.07.2020 година, донесени се вкупно 77 одлуки од кои 75 по тужби поднесени од тужителот Алијанса за Албанците и Алтернатива, една одлука по тужба поднесена од тужителот Интегра Македонска Конзервативна Партија, како и една одлука по тужба поднесена од тужителот Живка Арсовска и по истите донесени се пресуди со кои тужбите на тужителите се одбиваат како неосновани и решенијата на ДИК се потврдуваат, информира Управниот суд.