Не е никаква тајна дека Новак Ѓоковиќ има армија од македонски навивачи кои го бодрат секој негов настап на АТП турот, а особено на гренслемите, турнирите од Мастерс серијата 1.000 како и завршниот во сезоната и ја прославуваат секоја победа. Но, симпатичната видео снимка што е објавена на интернет платформите на крајот од првата натпреварувачка недела на Вимблдон не остави никого рамнодушен во земјава. Српскиот тениски маестро преку интернет се дружеше во живо со своите фанови, во еден момент го спомена туристичкиот бисер Охрид, а во наредниот ја пушти познатата песна „Македонско девојче“ и отпеа некој стих.
Потегот на моментно водечкиот светски тенисер допре и до премиерот Зоран Заев. Претседателот на Владата преку својот Фејсбук налог упати отворена покана до Ѓоковиќ за посета на земјава и воедно му посака успех на третиот гренслем во сезоната на кој Србинот ја брани титулата.
„Драг Новак Ѓоковиќ, твојата изведба на преубавата песна „Македонско девојче” нѐ воодушеви сите во нашата земја. Прекрасно е чувството кога ас како тебе се обраќа со почит и љубов на нашиот македонски народ и на сите граѓани во Северна Македонија. Те чекаме во Охрид и во Скопје и на сите други убави места во нашиот мозаик од култури и вредности. Ти упатувам отворена покана во име на Владата и во име на нашите граѓани. Воедно, те следиме на Вимблдон и ти посакуваме успех“, напиша Заев во постот на Фејсбук.
Ѓоковиќ е осминафиналист на Вимблдон и за пласман во топ 8 ќе играт против Французинот Иго Умбер. Во досегашните три настапи во Лондон, српскиот тенисер загуби само еден сет и тоа од Полјакот Хуберт Хуркач (7:5, 6:7, 6:1, 6:4) во третото коло по максималните победи над Германецот Филип Колшрајбер (6:3, 7:5, 6:3) и против Денис Кудла од САД (6:3, 6:2, 6:2).