На подготвителниот состанок за Советот на министри во Брисел е постигнат консензус за одобрување на почеток на преговори со Македонија и со Албанија за членство во Европската Унија (ЕУ). Ваквата одлука треба и формално да биде одобрена од Европскиот совет кон крајот на неделата за што повеќе информации ќе бидат објавени во текот на денот.
Текстот со заклучоците кои може да претрпат мали промени по утрешниот министерски состанок гласи – „откако го разгледа извештајот на Европската Комисија за напредокот на Северна Македонија од 2 март 2020 година, Советот го поздравува тоа што земјата покажа одлучност во напредокот на ЕУ агендата и испорача опипливи и одржливи резултати“.
„Со оглед на остварениот напредок и исполнувањето на условите поставени едногласно од Советот во јуни во 2018 година, Советот одлучува да отвори преговори со Република Северна Македонија“, се вели во текстот.
Одлуката треба да биде политички потврдена на Европскиот Совет в четврток. Нацрт заклучокот предвидува првата меѓувладина конференција да се одржи „што е можно поскоро“, но засега нема прецизирано датум.
Советот нотира дека Европската Комисија веднаш ќе започне со подготвителна работа, што подразбира поставување на преговарачка рамка. Сличен заклучок има и за Албанија, но со неколку услови повеќе за одржувањето на првата меѓувладина конференција.
Министрите утре најверојатно ќе одржат видео-конференција поради пандемијата на Ковид-19, процедурално тоа може да го забави конечното носење на одлуката.
Ова пред неколку дена го најави и вицепремиерот за европски прашања, Бујар Османи кој во таа прилика рече дека е „постигнат консензус во Европската Унија (ЕУ) за донесување на одлука за почеток на преговори со Република Северна Македонија, истата е безусловна и со барање за одржување на првата меѓувладина конференција веднаш по одобрување на преговарачакта рамка“.
За денеска во Брисел е закажан состанок на Советот за надворешни работи, утре ќе заседава Советот за општи работи додека 26 и 27 март се резервирани за седница на Европскиот совет на која треба да биде официјализирана одлуката за отпочнување на процесот на преговори со С. Македонија и Албанија за членство во (ЕУ).
Ројтерс: ЕУ ќе започне преговори со Северна Македонија и Албанија неделава
Агенцијата Ројтерс, повикувајќи се на свои извори, пишува дека во последниот нацрт заклучок се носи едногласна одлука за почеток на преговорите за членство со Скопје и Тирана.
„ЕУ ќе започне пристапни преговори со Албанија и Северна Македонија, според нацрт едногласна одлука на 27-те земји членки и треба да биде финализирана оваа недела“, пишува Ројтерс.