Коосновачот на талибанското движење, мула Абдул Гани Барадар ќе ја предводи новата авганистанска влада, изјавија денеска извори од исламистичката група, додавајќи дека информацијата ќе биде наскоро објавена, пренесува агенцијата Хина.
На Барадар, кој раководи со политичката канцеларија на талибанците, на високите владини позиции ќе му се придружат мула Мохамад Јакуб, син на починатиот талибански основач, мула Омар-и-шер-Мохамад Абас Станекзаи, посочија три извори.
Сите највисоки челници пристигнаа во Кабул, каде во завршна фаза се подготовките за објавување на новата влада, изјави талибански функционер за „Ројтерс“, под услов да остане анонимен, пренесува Хина.
Барадар на 17 август се врати во Авганистан од Катар, каде со месеци ги водеше преговорите со САД, а потоа и мировните преговори за Авганистан. Тој беше уапсен во 2010 година и ослободен од пакистанскиот затвор пред помалку од три години на барање на САД.
Барадар е роден во провинцијата Урузган во 1968 година и растел во Кандахар. Тој се придружи на борбата на муџахедините против Советите во 80-тите години од минатиот век и оттогаш напредуваше кај талибанците. „Гардијан“ пренесува дека неговиот прекар бил „касап“, поради бруталноста.