Европа да има 16 репрезентации, наместо досегашните 13, Африка со девет, Азија со осум претставници, по шест од зоните КОНКАКАФ (Северна и Средна Америка и Карибите) и КОНМЕБОЛ (Јужна Америка) и една од Океанија. Ова е предлог на Одборот за проширување на мундијалите при Светската фудбалска асоцијација (ФИФА) за СП 2026 со 48 учесници, а конечната одлука ќе биде донесена на Конгресот во Бахреин во мај оваа година.
За двете преостанати места е замислено да разигруваат шест селекции на турнир во организација на домаќинот на СП. Меѓу нив ќе нема национални тимови од стариот континент, два се планирани од конфедерацијата на домаќинот на мундијалот и по еден од останатите четири фудбалски зони. Домаќинот и натаму ќе има загарантирано учество со таа разлика што конфедерацијата би имала еден репрезент помалку.
Проширувањето на Светските фудбалски првенства беше усвоено по предлог на претседателот на ФИФА, Џани Инфантино во јануари оваа година. Идејата е 48. репрезентации да бидат поделени во 16 групи по три тима, во нокаут фазата би продлжиле најдобрите две од секоја конкуренција или вкупно 32.
Европа досега даваше 13 селекции, Јужна Америка и Африка по пет, Азија четири, а КОНКАКАФ зоната три. Бројката од 32 репрезентации се дополнуваше со интерконтинентални баражи меѓу претставници од КОНКАКАФ и Океанија, односно, Јужна Америка и Азија.
Формати на досегашните Светски првенства
Уругвај/1930 година – Учествуваа 13 репрезентации поделени во четири група од кои една со четири тима, а во три имаше по три. Првопласираните обезбедуваа место во полуфинале
Италија/1934 година – Учествуваа 16 селекции, се играше нокаут фаза од почеток до крај
Бразил/1950 година – Беа планирани 15 тима, учествуваа 13 кои беа поделени во четири групи. Победниците од нив формираа нова, финална, група во која се играше по принципот „секој до секого“. Репрезентацијата со најмногу бодови беше шампион
Швајцарија/1954 година – Беа формирани четири групи по четири репрезентации. Секоја од нив, наместо три меча, играше по два во групната фаза. Двете најдобропласирани продолжуваа во нокаут фаза
Шведска/1958 година – Турнир со четири групи по четири репрезентации. Секоја играше по три меча, двете најдобри селекции продолжуваа во нокаут фазата
Западна Германија/1974 година – Турнир со 16 репрезентации поделени во четири групи. Двете најдобри селекции продолжуваа во втор круг и се формираа нови две групи по четири тима. Победнивите во нив играа во финале, а второпласираните за трето место
Шпанија/1982 година – Прво Светско првенство со 24 тима што беа поделени во шест групи. Двете најдобри д секоја одеа во втор круг што значеше нови четири групи со три репрезентации. Првопласираните во нив играат во полуфинале
Мексико/1986 година – Шест групи со четири репрезентации. Двете првопласирани од секоја конкуренција и четирите најдобри третопласирани тима влегуваа во нокаут фаза
Франција/1998 година – Учествуваа 32 репрезентации поделени во осум групи. По две најдобри од секоја група одеа во нокуат фаза