Во процес на врачување се првите 100 биометриски пасоши на Република Северна Македонија што се мобилно издадени преку Амбасадата во Лондон. Со воспоставување на базната станица во оваа амбасада, се поедностави и скрати постапката на стекнување со нова патна исправа за нашата дијаспора во Обединетото Кралство на само три недели, која претходно траеше четири до шест месеци, посочи амбасадорката Александра Миовска која моментот го опиша како историски за конзуларната пракса и изрази задоволство од позитивниот фидбек (feedback) на нашите државјани кои живеат и работат таму.
Ова е историски момент за конзуларната пракса во оваа амбасада. Нашите граѓани кои живеат и работат во Англија, Шкотска, Велс или Северна Ирска од сега можат да ги обноват своите пасоши на многу поедноставен, поефикасен и побрз начин. Ме радува што првичните впечатоци и реакции од сите кои ја посетија амбасадата во изминатите четири недели се позитивни. Тој е најсилниот мотив и предизвик за тимот на амбасадата да продолжи и натаму да биде ефикасна служба во корист на граѓаните, посочи Миовска.
Дијаспората ја поздравуваа новата постапка.
Денеска го подигнав мојот пасош. Би сакала да се заблагодарам на целиот тим на нашата амбасада. Сè протече многу „мазно“. Постапката за стекнување со нова патна исправа беше многу лесна. Не се чека многу. Одлична инвестиција за забрзување на постапката за издавање на пасоши во конзуларното претставништво во Лондон, истакна македонски граѓанин кој живее и работи во Обединетото Кралство.
Целта на проектот на Министерството за надворешни работи (МНР) за воспоставување на базни и мобилни станици во македонските дипломатски и конзуларни претставништва е исполнување на потребите на дијаспората, која со години наназад се жали за бавно издавање на патни исправи.
„Подобрувањето на услугите на нашите ДКП-а за дијаспората е висок приоритет на МНР, чија интенција е следниот период овој значителен проект да се прошири со поголем број ДКП-а“, нагласуваат од МНР.