Се враќа неизвесноста за шампионската титула во Премиерлигата. Заслугите за тоа одат на сметка на Жозе Мурињо чиј Манчестер јунајтед во дербито на 33 коло го разоружа Антонио Конте и го совлада неговиот Челзи со 2:0, па лондонските ривали сега ги делат четири бода на врвот на табелата. „Сините“ од „Стемфорд бриџ“ имаат 75, „спарси“ се зад нив со 71.
Португалецот се реши за изненадувачки потег за почетниот состав каков не очекуваше никој, а на најмаллку Конте. На клупа го остави Златан Ибрахимовиќ и на терен го испрати Маркус Рашфорд на што младиот англиски репрезентативец одговори на најдобар можен начин. Го постигна водечкиот гол во осмата минута, откако доби длабочинска топка на Андер Ерера што ја прифати и успеа да му побегне на Давид Луиз.
Реализацијата предизвика забелешки на адреса на главниот судија Медли кој не виде контакт со рака на Шпанецот за прекин на акција на Челзи, а неми во ситуацијата останаа и неговите асистенти.
До паузата изостанаа возбудувања на „Олд трафорд“. Манчестер Ј. ја имаше контролата, а Челзи тешко врзуваше игра, беше немоќен во креацијата на прилики и овојпат беше бледа сенка на лидер на табелата. Накусо по враќањето на терен „црвените ѓаволи“ ја дуплираа предноста. Асистентот на водечкиот гол, во 49 минута и самиот се впиша во листата на стрелци за 2:0. При движење кон голот, топката го закачи Курт Зума, го прени правецот и отседна во мрежата.
Рашфорд, денешниот џокер на Мурињо, по еден час игра имаше прилика за нов гол меѓутоа шутира крај рамките на работното место на Асмир Беговиќ. Конте се обиде со замени да избегне пораз. Ги уфрли Фабрегас наместо Мозес, Вилијан наместо Матиќ и Лофтус-Чик наместо Зума, но посакуваниот ефект изостана, прво на задоволство на Жозе Мурињо и Манчестер јунајтед, а потоа и на Маурисио Покетино и Тотенхем кој по триумфот над Борнмут со 4:0 сериозно се враќа во игра за шампионскиот трон.
Премиерлига, 33 коло
Резултати
Манчестер јунајтед – Челзи 2:0
ВБА – Ливерпул 0:1
Саутемптон – Манчестер сити 0:3
Вотфорд – Свонси 1:0
Сандерленд – Вест Хем 2:2
Стоук – Хал 3:1
Евертон – Барнли 3:1
Кристал палас – Лестер 2:2
Тотенхем – Борнмут 4:0
Мидлсборо – Арсенал (понеделник 20,45 ч.)
Табела: Челзи 75 (-1), Тотенхем 71 (-1), Ливерпул 66, Манчестер сити 64 (-1), Манчестер јунајтед 60 (-2), Евертон 57, Арсенал 54 (-3), ВБА 44, Саутемптон 40 (-2), Вотфорд 40 (-1), Стоук 39, Лестер 37 (-1), Вест Хем 37, Барнли 36, Кристал палас 35 (-1), Борнмут 35, Хал 30, Свонси 28, Мидлсборо 24 (-2), Сандеренд 21 (-1).