Челзи ја оствари десеттата победа во низа во Премиерлигата. „Сините“ на Антонио Конте славеа кај Сандерленд со 1:0. Стрелец на единствениот погодок на „стадионот на светлината“ на англискиот североисток беше Сеск Фабрегас во 40 минута. Со овие три бода, тимот од Лондон ја зголеми предноста на врвот на табелата на шест бода во однос на Ливерпул и Арсенал на второто, односно, третото место.
Победи впишаа и останатите фаворити – Манчестер јунајтед, Манчестер сити, Ливерпул и Тотенхем. Сите четири екипи што важеа за фаворити во средбите од 16 коло и се потврдија како такви. „Црвените ѓаволи“ славеа на гости кај Кристал палас со 2:1 благодарение на погодокот на Златан Ибрахимовиќ во 88 минута. Во улога на асистент е јави Пол Погба чие дело беше водечкиот гол за составот од „Олд Трафорд“ во втората минута од екстра времето на првиот дел. За домашната екипа погоди Мекартур во 64 минута.
Сити на „Етихад“ го совлада Вотфорд со 2:0 (Забалета 33 минута, Силва 86 минута), Ливерпул со три гола (3:0) ги обезбеди трите бода на теренот на Мидлсборо (Лалана 29 минута, 68 минута и Ориги 60 минута), а со ист резултат „спарси“ на „Вајт Харт Лејн“ го поразија Хал сити (Ериксен 14 минута, 63 минута и Ванјама 73 минута).
Премиерлига
Резултати, 16 коло
Мидлсборо – Ливерпул 0:3
Кристал палас – Манчестер јунајтед 1:2
Манчестер сити – Вотфорд 2:0
Тотенхем – Хал 3:0
Сандерленд – Челзи 0:1
Вест Хем – Барнли 1:0
ВБА – Свонси 3:1
Стоук – Саутемптон 0:0
Евертон – Арсенал 2:1
Борнмут – Лестер 1:0
Табела: Челзи 40, Ливерпул 34, Арсенал 34, Манчестер сити 33, Тотенхем 30, Манчестер јунајтед 27, ВБА 23, Евертон 23, Саутемптон 21, Борнмут 21, Вотфорд 21, Стоук 20, Барнли 17, Лестер 16, Вест Хем 16, Кристал палас 15, Мидлсборо 15, Свонси 12, Хал 12, Сандерленд 11.