Фудбалерите на Ливерпул можеби на моменти беа подобри и поконкретен, а на моменти побрз и поодлучни од Тотенхем во дербито на 32. коло во англиската Премиерлига, но имаа и луда среќа во финишот на средбата. Победија со 2:1 со автоголот на Тоби Алдервејрелд на што кумуваше и лоша реакција на голманот Уго Лори и се вратија на врвот на табелата со два бода повеќе од Манчестер сити меѓутоа и натпревар повеќе од „граѓаните“ на Пеп Гвардиола.
Стадионот „Енфилд роуд“ и воопшто градот на славните Битлси е на нозе. Дел симпатизерите на „црвените“ веруваат дека среќата ги следи храбрите, а денешната победа е знак дека, конечно, е дојдено време за прослава на 19 шампионска титула, прва по 1990 година. „Спарси“, пак, го доведоа во прашање пласманот во Лигата на шампиони, откако веќе петти меч не знаат за триумф во домашното натпреварување (четири порази и реми).
Тотенхем важеше за најтешка пречка за Ливерпул во финишот на сезоната. Во преостанатите шест меча ќе гостуваат на Саутемптон, на Кардиф и на Њукасл и ќе играат пред своја публика против Челзи, против Хадерсфилд и во последното коло против Вулверхемптон.
Распоредот, пак, на Манчестер сити до крај на сезоната е следен – на „Етихад“ ќе допатуваат Кардиф, Тотенхем и Лестер, а составот на Гвардиола ќе гостува на Кристал Палас, на Манчестер јунајтед, на Барнли и на Брајтон.
Премиерлига, 32 коло
Ливерпул – Тотенхем 2:1
Кардиф – Челзи 1:2
Вест Хем – Евертон 0:2
Брајтон – Саутемптон 0:1
Барнли – Вулверхемптон 2:0
Кристал Палас – Хадерсфилд 2:0
Лестер – Борнмут 2:0
Манчестер јунајтед – Вотфорд 2:1
Фулам – Манчестер сити 0:2
Арсенал – Њукасл (понеделник, 21 ч.)
Табела: Ливерпул 79, Манчестер сити 77 (-1), Тотенхем 61 (-1), Манчестер јунајтед 61 (-1), Арсенал 60 (-2), Челзи 60 (-1), Вулверхемптон 44 (-1), Лестер 44, Евертон 43, Вотфорд 43 (-1), Вест Хем 42, Борнмут 38, Кристал Палас 36 (-1), Њукасл 35 (-1), Брајтон 33 (-2), Саутемптон 33 (-1), Барнли 33, Кардиф 28 (-1), Фулам 17, Хадерсфилд 14.