Шкендија осетно се засили за втората половина од фудбалската сезона, но и за целата наредна. Тетовци во фото-финиш на зимскиот преоден рок успеја да ги обезбедат услугите на Бесарт Абдурахими. Договорот со македонскиот репрезентативец е на 18 месеци и ќе биде голем плус за Томас Брдариќ во потерата по Вардар за шампионската титула во домашната сцена.
Абдурахими доаѓа во Шкендија како играч на Локерен иако во 2016 година на двапати беше испратен на позајмица, најпрво во Астана од Казахстан, каде е Агим Ибраими, а потоа и во јапонски Серезо Осака. Шест години (2008-2014) ги мина во хрватскиот прволигаш Загреб, а сезоната 2013/14 настапуваше како позајмен фудбалер во Хапоел од Тел Авив.
Бесарт Абдурахими е роден на 31 јули во 1990 година во Загреб, но потеклото на неговите родители е од Врапчиште. Албанските медиуми го споменуваа како опција во националниот тим на западниот сосед, можност што отпадна по прифаќање на поканата да заигра за Македонија. Ја прифати и дебитира во пријателските средби против Камерун и Катар во мај во 2014 година.
Оттогаш одигра вкупно 12 меча во „црвено-жолтиот“ дрес и постигна еден гол во победата (3:2) против Луксембург на домашен терен во квалификациите за ЕП 2016. Абдурахими беше дел од сите младински репрезентативни категории во Хрватска (У16, У17, У18, У19, У20, У21).
„Ми причинува големо задоволство што станав дел од Шкендија. Со нетрпение го чекам официјалното деби и се надевам дека ќе бидам од помош за остварување на клупските цели. Добар дел од фудбалерите ги познавам од настапите за репрезентацијата на Македонија како Цуцули, Положани, Хасани, Алими. Затоа не верувам дека ќе наидам на проблеми за адаптирање во екипата. Познато ми е дека Шкендија има армија верни навивачи кои верувам дека ќе успееме да ги израдуваме на крајот на сезоната“, рече Абдурахими при промоцијата во Тетово.
Шиков го привлече Работнички на пест месеци
Ванче Шиков е вториот репрезентативец кој ќе настапува на македонскките тревници во пролетниот дел од сезоната. Стоперот на „црвено-жолтиот“ тим постигна договор со Работнички за шесте месеци што следуваат и тој, како и Абдурахими, ќе биде големо засилување за дебармаалци во намерата за нов излез на европската сцена. Ова особено се однесува на одбраната во тимот од Градски парк кој треба да добие на цврстина и стабилност.
„Ванче Шиков е долгогодишен македонски репрезентативец на Македонија. Неговите квалитети се неспорни. Задоволство ми е што успеавме да договориме соработка за наредните шест месеци“, истакна Драган Поповски, претседател на Работнички.
Шиков се враќа во домашното првенство по долги години настапи во странство. Статусот на интернацоналец го стекна во 2003 кога потпиша за Шкода Ксанти во Грција каде се задржа три сезони, а во континуитет го има од 2007/08. Во грчкиот шампионат играше и за Олимпијакос, Керкира и Аполон Каламаријас, потоа беше дел од кипарски Етникос Ахна, па Волин Лутск во Украина, Австрија Виена и Нефчи во Азербејџан.
Работнички е трет негов клуб во Македонија по Тиквеш и Победа. За Македонија дебитира во 2007 година и постигна четири гола во 52 натпревара досега.
„Во пролетниот дел на првенството ќе играм во дресот на Работнички. Мислам дека во моментот го одбрав најдоброто решение за мене. Имав понуди и од Казахстан, но не сакав повторно да ми се случи непријатната епизода од Азербејџан. За мене е најважно да играм стандардно и токму затоа го одбрав Работнички. Верувам дека заедно ќе успееме да ја оствариме зацртаната цел за излез во Европа“, изјави Шиков по пристигнување во Работнички.