Јасни се препораките дека природниот имунитет по прележување на болеста, со тек на време се намалува и вакциналниот е оној што е потраен. Во таа смисла, Американскиот центар за контрола на болести укажува на тоа, Светската Здравствена Организација тоа го укажува, според препораките 10 дена по тестирањето кај асимптоматските пациенти се препорачува вакцинација, се вели во препораката на Министерството за здравство (МЗ).
„Значи, сите препораки одат кон тоа за што пократко време, луѓето да се имунизираат. Точно е дека има студии што препорачуваат и констатираат дека луѓето, граѓаните имаат имунитет и после пет-шест месеци по прележување на болеста, дури студии и после 8 месеци, меѓутоа природниот имунитет се намалува. Имајќи предвид дека имаме препораки за што поскоро вакцинирање, битно е граѓаните да се вакцинираат и за што пократко време да се постигне колективен имунитет. Не можеме веќе да чекаме и да се соочуваме со нови бранови, а низок процент на вакцинација. Тоа е логиката и за препораката од 45 дена по прележувањето граѓаните да се вакцинираат. Нема зошто да се одложува вакцинацијата, а бенефитот е подигање на колективниот имунитет, за целосно да се смени сликата со пандемијата“, нагласуваат од МЗ.