Финска од утре го презема ротирачкото шестмесечно претседавање со Европската Унија (ЕУ). Ова е третпат, според утврдениот распоред, скандинавската држава да биде на чело на Советот на ЕУ, тело што ги обединува министрите на земјите – членки и се состанува за прашања од земјоделство до внатрешни и надворешни теми.

Земјата членка што претседава во период од шест месеци ги одржува сите состаноци на Советот на ЕУ, освен Советот на министри за надворешни работи, со кој претседава министерот за надворешни работи на ЕУ. Во исто време, земјата претседавач е обврзана да води работни и стручни групи, но и да соработува со Европската комисија и со Европскиот парламент во име на Европскиот совет.

Финска го презема претседателството со Советот на ЕУ од Романија, а на 1 јануари 2020 година ќе го предаде на Хрватска. Пред да го преземе претседателството со Советот на ЕУ, Финска најави дека нејзината програма ќе се заснова на социјалната, економската и еколошката одржливост на Европа.

Како клучен приоритет на своето претседателствување, Финска ја наведува улогата на ЕУ во борбата против климатските промени. Програмата на финското претседавање опфаќа и зајакнување на единствен пазар, политика базирана на слободна трговија, користење на потенцијалите што овозможуваат развој, иновации и дигитализација.