Хрватска од денеска е новиот претседавач со Европската Унија (ЕУ). Претседавањето го презема од Финска, а во јуни ќе го предаде на Германија. Официјален Загреб овој ден го смета за историски, имајќи предвид дека државата е последната која влезе во ЕУ, а веќе има сериозна задача пред себе.
Хрватскиот премиер Андреј Пленковиќ во наредните денови ќе биде домаќин и ќе има средби со голем број од челниците на европските институции. Два дена по вториот круг на претседателски избори во земјата на 5 јануари, тој ќе отпатува во Париз на средба со францускиот претседател Емануел Макрон. Меѓу темите на разговор, според најавите, ќе биде и проширувањето на ЕУ што ќе биде високо на агендата за време на хрватското претседателство.
На 8 јануари во Загреб ќе гостува претседателот на Европскиот Совет, Шарл Михел, а на 16 јануари, Пленковиќ ќе патува во Германија на средба со канцеларката Ангела Меркел.
Владата во Загреб веќе ги започна и подготовките за Самитот на ЕУ, кој во мај ќе се одржи во Хрватска. Овој самит има големо значење и за нашата земја. Северна Македонија, по состанокот на Унијата во октомври во Брисел, има големи очекувања од самитот во Загреб, каде што се очекува да биде доделен и конкретен датум за почеток на преговорите за членство.
Хрватската Влада неколку пати го повтори ставот дека отворањето на преговорите со Северна Македонија и Албанија е нешто што треба да се случи за време на нивното претседателство, порака што до Макрон, пред неколку недели, упати и премиерот Пленковиќ. Хрватските власти најавија дека на мајскиот самит во Загреб ќе бидат поканети да учествуваат и шест држави од Југоисточна Европа.
По Хрватска, претседателството со ЕУ ќе го преземе Германија за потоа, во ротацијата, да следуваат Португалија, па Словенија.
Албанија презема претседавање со ОБСЕ
Албанија, пак, од денеска ја наследува Словачка во претседателството со Организацијата за безбедност и соработка (ОБСЕ), најавувајќи дека еден од нејзините клучни приоритети ќе бидат напорите за решавање на конфликти. Функцијата претседавач, како што е најавено во соопштението на ОБСЕ, ќе ја извршува албанскиот премиер, Еди Рама.
Тој истакна дека преземањето на претседателството со ОБСЕ е историски момент и чест за Албанија.
„Претседавањето со ОБСЕ е кулминација на нашата значајна трансформација“, истакна тој.
Албанија ќе се фокусира на заедничко спроведување на основите на ОБСЕ, како што е спречување ескалација на конфликти, следење избори, поддршка на реформите, подобрување на безбедноста и просперитетот на граѓаните, итн.
„Кризата во Украина и се што се случува околу неа останува актуелен безбедносен предизвик во Европа. Напорите за решавање конфликти ќе бидат на врвот на приоритетите на албанското претседателство затоа што е неприфатливо долгогодишните конфликти во регионот на ОБСЕ да продолжат да влијаат врз животите“, рече Рама.
Тој, исто така, посочи дека борбата против корупцијата ќе биде приоритет, бидејќи корупцијата ги поткопува темелите на демократијата и има негативно влијание врз просперитетот и безбедноста на регионот на ОБСЕ, заедно со транснационалните закани.
Рама истакна дека ќе продолжи да се бори против говорот на омраза ширум Европа и ја нагласи потребата за засилени напори за борба против дискриминацијата и промовирање на човековите права и слободи. Официјалното преземање на албанското претседателството со ОБСЕ е закажано на 9 јануари во Виена.