Тежок удар по шампионските амбиции на Барселона. Каталонците загубија на гостувањето кај Малага со 2:0 и пропуштија прилика за бодовно израмнување со Реал Мадрид и преземање на врвот на табелата во Примера.
Тимот на Луис Енрике беше просечен на „Ла Росаледа“. Беше прилично далеку од вообичаеното ниво, често правеше грешки и оставаше доста простор за разигрување на расположениот ривал чии контранапади беа постојана закана по Тер Штеген. Од една таква ситуација, во 32 минута, Малага поведе преку Сандро Рамирез кој ја искористи, почетнички, бавната реакција на противничките играчи во дефанзивната линија и ги фрли во транс навивачите на трибините.
Мисијата на домашните за задржување на стекната предност беше олеснета во голема мера во 65 минута. Офанзивата на Барса по израмнување ја „пресече“ Нејмар. Бразилецот доби директен црвен картон и ги остави на цедило соиграчите.
Тие, пак, во продолжение на средбата честопати трошеа енергија на полемика со судијата одошто ја насочуваа кон голот на Малага, а дополнително ги измести и недосудениот пенал, прекршок што беше извлечен надвор од казнениот простор. Конечните 2:0 ги постави Хони во 90 минута.
Победник немаше во фудбалската битка за Мадрид. Реал и Атлетико одиграа 1:1 на „Сантијаго Бернабеу“, исход што, за среќа по „кралскиот клуб“, подоцна не беше искористен од Барселона. Пепе обезбеди предност за екипата на Зидан во 52 минута што ја поништи Антоан Гризман во 85 минута.
„Кралевите“ остануваат лидери на табелата со 72 бода, три повеќе од Каталонците и меч помалку, Атлетико Мадрид е трет со 62.
Примера, 31 коло
Резултати
Малага – Барселона 2:0
Севилја – Депортиво ла Коруња 4:2
Реал Мадрид – Атлетико Мадрид 1:1
Еспањол – Алавес 1:0
Вилјареал – Атлетик Билбао 3:1
Гранада – Валенсија (недела, 12 ч.)
Селта – Еибар (недела, 16.15 ч.)
Осасуна – Легањес (недела, 18.30 ч.)
Лас Палмас – Бетис (недела, 20.45 ч.)
Реал Сосиедад – Спортинг Хихон (понеделник, 20.45 ч.)