Денеска на скопскиот аеродром пристигнаа 500.000 вакцини што ги купивме од производителот Синовак. Вакцините ќе бидат соодветно складирани во Поликлиниката „Јане Сандански“ и на Институтот за судска медицина каде што има доволно капацитет да се сместат во ладните соби по што ќе бидат дистрибуирани до пунктовите низ државата, согласно закажаните термини за вакцинација. Ова е најголема количина на вакцини која одеднаш пристигна во нашата држава, информираа од Министерството за здравство.
– Со процесот на имунизација досега и вакцинирањето на голем број граѓани покажуваме одлични резултати во намалувањето на боројот на новозарзени со Ковид 19, и на хоспитализиарани граѓани, за што говори фактот дека сите ковид центри низ државата се празни, а мал е бројот на хоспитализирани пациенти и на Инфективната клиника. Изразувам голема благодарност до Владата на Народна Република Кина и кинескиот народ за поддршката која ни ја дадоа во борбата против корона вирусот – изјави државниот секретар на Министерството за здравство, Иванка Стојаноски.
Амбасадорот на Народна Република Кина Џанг Ѕуо истакна:

– Светската здравствена организација ја одобри вакцината Синовак за итна употреба на 1 јуни. Како и вакцината Синофарм, вакцината Синовак е исто така инактивирана вакцина. Кина сега вакцинира луѓе на возраст од 3 до 100 години. Во Кина се администрирани над 1,1 милијарда дози. Верувам дека вакцината ќе и помогне на Северна Македонија да изгради имунолошка бариера и да формира цврста линија на одбрана за заштита на животот и здравјето на луѓето. – потенцираше Џанг Ѕуо.

Претходно министерот за здравство, Венко Филипче,  објави на својот Фејсбук профил дека првиот авион од вкупната пратка од 500.000 дози вакцини, што ги купивме од производителот „Синовак“ слетала утрово на скопскиот аеродром.

– Благодарност до Народна Република Кина за заложбите да ја добиеме оваа поголема количина на вакцини и за точноста во испораката на истите, порача Филипче.

Ова е најголемата пратка на вакцини што пристигнуваат во земјата, а според најавите на министерот Филипче, со нив граѓаните ќе почнат да се вакцинираат на почетокот од идната недела.

Тој синоќа на својот Фејсбук профил напиша дека вакцината „Синовак“ е ефикасна, безбедна за користење и одобрена од Светската здравствена организација.

– Еве ги официјалните карактеристики на вакцината Синовак објавени од СЗО – Инактивиран САРС-Ков2 вирус, потребни се две дози, втората доза од 14-28 дена по првата доза, високо ефикасна за превенција на тешка болест, се дава мускулно во рамо, препорачана за употреба кај бремени жени кога придобивките од вакцинацијата за бремената жена се поголеми од потенцијалните ризици. Препорачана за употреба кај доилки како и кај други возрасни лица,  порача министерот Филипче.

Во земјата пред два дена пристигнаа и над 100 илјади вакцини од „Фајзер“, преку Ковакс механизмот.