Оливер Ошавковски, Сашо Сенков и Александар Јаневски – Тошта добија по 30 дена притвор додека Николче Димитриевски се уште е во Судот каде ја чека одлуката, откако сите беа уапсени вчера, во врска со насилствата во Собранието на 27 април.
Ошавковски, Сенков и Димитриевски беа уапсени откако МВР преку фотографии побара помош од граѓаните со информација која би довела до нивна идентификација и апсење. Сите тројца беа уапсени вчеравечер.
Претходно денеска 30 дневен притвор јавен обвинител од ОЈО определи Андреј Мицов (22), Никола Војминовски (39), Коста Делов (26) и Стојан Павлески – Кобра (51) сите под истрага за убиство во обид со соизвршителство, за нападот врз пратеникот Зијадин Села.
На Александар Јаневски – Тошта (57) осомничен за истото дело, не беше определена мерка, бидејќи за време на распитот во полициската станица му се слошило и бил пренесен на кардиологија.
Јаневски – Тошта по крвавиот четврток изјави дека тој не го нападнал пратеникот Зијадин Села, туку дека помогнал да го извадат од толпата. Тошта на денот на локалните избори завчера, кога се чекаа резултатите беше во штабот на ВМРО-ДПМНЕ. Тој е претседател на општинскиот огранок од Кисела Вода на здружението „Гардист 2001“ и претседател на Кинолошкото друштво Скопје.
Коста Делов самиот призна дека учествувал во тепањето на Села и заедно со Никола Војминовски уште во мај беа повикани на разговор за настаните што се случија на 27 април во Собранието, но беа ослободени.
„Чувството кога брутално си го тепал Зијадин Села со клоци по глава, бесценето“, напиша Коста Делов на својот Фејсбук профил по настаните во Собранието.
Најмладиот, Андреј Мицов, исто така на Фејсбук објавуваше слики со качулка во Собранието на 27 април.
За обидот за убиство на Села, пред неколку месеци беа уапсени и обвинети Кире Ѓоргиевски и неговиот татко и тие се наоѓаат во истражниот затвор Шутка.
ВМРО-ДПМНЕ денеска соопшти дека пратеничката група на коалицијата ќе поднесе амандман на Законот за амнестија или ќе предложи посебен закон за прекин на постапката и ослободување на лицата учесници во немилите настани од 27 април 2017.
„Сметаме дека овој чин ќе придонесе кон помирување во Македонија и релаксирање на политичките тензии“, пишува во соопштението.