Во Јужна Африка во 2010 година ја освои шампионската титула, во Бразил во 2014 година не успеа ниту низ групата, но, сеедно, Шпанија остави неизбришлива трага во светскиот фудбал во последните десет години. Нејзините клубови подигнаа 13 од последните 14 трофеи на престижните натпреварувања, нејзината, пак, репрезентација е првата што во истовреме била планетарен, континентален и олимписки првак. По дифолт е фаворит каде и да се појави, а така ќе биде и ова лето во Русија каде „црвената фурија“ се вбројува во редот на петте најсериозни кандидати за тронот.
Шпанскиот ростер обединува(ше) мноштво ѕвезди. Меѓу нив и неуморниот Андрес Иниеста, последната оска на неверојатниот триаголник во средниот ред покрај Чаби Алонсо и Чави, за кого претстојниот мундијал, најверојатно, ќе биде последен во кариерата. Иако има 34 години, сепак, играчот на Барселона и натаму важи за мотор на националниот тим, а негово дело беше голот против Холандија за злато на турнирот пред осум години. Со пребогатото искуство што го носи во себе и со поддршка на помладите колеги како Марко Асенсио, Иско и Тиаго, ќе претставува силен адут, ако не и најсилен, во намерата за детронизирање на Германија.
Велат дека е лесно да се очекуваат и освојуваат пехари кога под команда ги имате едни од најдобрите во било кој спорт. Но, истовремено, е ѓаволски тешко да се балансира индивидуалното во функција на колективното и на опшиот амбиент во средината, особено во ѕвездена каква е шпанската што може да подразбира его, суети, различни карактери, итн. За нивелирање е задолжен селекторот Хулен Лопетеги, поранешен голман, кој е еден од ретките кои заиграле за вечните пиринејски ривали – Барселона и Реал Мадрид. На површина, сепак, исплива меѓу стативите на Рајо Валјекано, а по мандатите во младите шпански репрезентации (У19 и У21) и освоените европски круни со нив, како логична последица дојде и кормилото на сениорите по разделбата на федерацијата со Висенте дел Боске. Јавноста со доза на скептичност го прифати неговото назначување за селектор на фудбалската репрезентација на што тој одговори со 75 отсто победи во 16 официјални меча досега во кои нема пораз. Светското првенство во Русија ќе биде одлична прилика за убедување на оние за кои сè уште се резервирани во неговиот капацитет за највисоки дострели со националниот тим на големата сцена.
Конечен список на Шпанија за СП 2018
Голмани
Давид де Хеа (Манчестер Јунајтед)
Кепа Аризабалага (Атлетик Билбао)
Пепе Реина (Милан)
Одбрана
Жерар Пике (Барселона)
Серхио Рамос (Реал Мадрид)
Сезар Аспиликуета (Челзи)
Начо (Реал Мадрид)
Алваро Одриозола (Реал Сосиедад)
Жорди Алба (Барселона)
Дани Карвахал (Реал Мадрид)
Начо Монреал (Арсенал)
Среден ред
Серхио Бускетс (Барселона)
Марко Асенсио (Реал Мадрид)
Андрес Иниеста (Барселона)
Иско (Реал Мадрид)
Саул Нигез (Атлетико Мадрид)
Тијаго Алкантара (Баерн Минхен)
Коке (Атлетико Мадрид)
Давид Силва (Манчестер сити)
Напад
Јаго Аспас (Селта)
Родриго (Валенсија)
Диего Коста (Атлетико Мадрид)
Лукас Васкез (Реал Мадрид)
Селектор: Хулен Лопетеги
МЕЧЕВИ НА СП 2018
Португалија – Шпанија (15 јуни, 20 ч.)
Иран – Шпанија (20 јуни, 20 ч.)
Шпанија – Мароко (25 јуни, 20 ч.)
Резултати во подготвителниот период
Тунис – Шпанија 0:1
Шпанија – Швајцарија 1:1
Шпанија – Аргентина 6:1
Германија – Шпанија 1:1
Русија – Шпанија 3:3
Шпанија – Костарика 5:0
Лична карта на Шпанија
ФИФА ранг листа: 8 место
Прекар: Црвена фурија
Настапи на СП: 14
Најдобар пласман: шампиони во 2010 година
Настапи на ЕП: 10
Најдобар пласман: шампиони во 1964 година, во 2008 година и во 2012 година
Најдобар стрелец: Давид Вилја – 59 гола
Најмногу настапи: Икер Касилјас – 167 меча
Прв меѓународен меч: Шпанија – Данска 1:0 во 1920 година
Најубедлива победа: Шпанија – Бугарија 13:0 во 1933 година
Најубедлив пораз: Шпанија – Италија 1:7 во 1928 година