Британскиот министер за надворешни работи Борис Џонсон изјави дека координираното протерување руски дипломати покажало дека користењето нервен агенс во труењето на поранешниот руски шпион Сергеј Скрипал во Велика Британија, довело до кулминација на незадоволството кај меѓународната заедница поради однесувањето на Москва.
Џонсон во интервју за Би-Би-Си изјави дека Велика Британија и нејзините сојузници немаат никаков судир со рускиот народ, туку само со администрацијата на претседателот Владимир Путин.
Вкупно 15 земји членки на Европската унија, заедно со САД, Канада, Украина, Албанија, Македонија, Австралија одлучија да протераат руски дипломати во знак на солидарност со Велика Британија во случајот со труењето на поранешниот двоен шпион Сергеј Скрипал.
Москва, која остро ги негира обвинувањата за вмешаност во нападот, најави дека нејзиниот одговор на протерувањето руски дипломати ќе биде заснован на принципот на реципроцитет.
– Причината поради која тие го направија тоа (протераа дипломати) е затоа што одеднаш сфатија дека ова би можело да се случи и на нивна територија. Тие одеднаш увидеа дека ова е нов вид закана и оти Русија се однесува на специфично небрежен начин со посебен презир кон цивилизациските норми, рече Џонсон.
Тој истакна дека „за многу влади тоа што се случи во Салсбури, на некој начин, ги разјасни нивните лични фрустрации, лични разочарувања во начинот на кој се однесува Русија“.
Захарова: Зад акцијата на ЕУ стои НАТО
Портпаролката на руското Министерство за надворешни работи Марија Захарова денеска оцени дека зад акцијата на Европската унија стои НАТО, кој се користи со политика на казнување и се обидува да ја демонизира Русија.
– НАТО стои зад Европската унија. ЕУ е актрактивна политичка конструкција со моќната Северноатлантска алијанса зад себе, истакна Захарова.
Таа оцени дека „задачата е да се демонизира Русија“ и оти она на што сега сведочиме е дел од „долгорочната програма на неконтролирана русофобија“.
– Тоа е прашање не само за Русија како држава, туку прашање на Русите и рускиот народ“, изјава Захарова.
Таа нагласи дека САД и Обединетото Кралство стојат зад провокацијата во Салсбери и оти доказ за тоа се бројот на протераните руски дипломати.
– Да не беа денешните бројки, ќе нагаѓавме за причините на овој ѓаволски настап кој го изведе Обединетото Кралство или за реалната корист од целата ситуација, рече Захарова.
Таа потенцираше дека Русија однапред се подготвила за акцијата на британските сојузници.
– Сосема природно, по Самитот на ЕУ ние сфативме што ќе се случува и се подготвивме за тоа, изјави портпаролката на руското МНР.