Македонската престолнина вечерва ќе обедини граѓани од многу градови и населени места од внатрешноста. Нивна крајна станица ќе биде Илинденска ББ, повод е протестот на опозицијата предводена од ВМРО-ДПМНЕ против политиките на актуелната владејачка гарнитура и пред се тековните преговори за промена името со Грција. Свое обраќање пред присутните ќе новиот лидер на партијата Христијан Мицковски, а меѓу масата се очекува да биде неговиот претходник Никола Груевски и многумина поранешни и сегашни функционери во органите и телата на партијата.
Социјалните мрежи се веќе преплавени со автомобили и автобуси како се движат кон Скопје. Се најавува масовно присуство во центарот на главниот град, а Унијата за млади сили на најголемата опозициска партија од Тетово се обидува да го анимира членството и со слоганот „Станете Македонци“. Покрај тетовци, на пат кон Скопје (организирано или во сопствена режија) во моментот се и граѓани од Охрид, Ресен, Вевчани, Кочани, Македонска Каменица и од останатите градови.
Вечерашниот настан пред објектот на Владата наложува и посебен сообраќаен режим во централното градско подрачје во Скопје. Од Министерството за внатрешни работи (МВР) информираат дека булеварот „Илинден“ ќе биде затворен во двата правца, а од 20 часот истото ќе важи и за мостот „Гоце Делчев“ со пренасочување на сообраќајот по околните улици. Возилата на јавниот сообраќаен превоз (ЈСП) ќе може непречено да се движат по улицата „Димитрија Чуповски“ шѓто минува низ „Рекорд“.
Претходно во текот на денот, премиерот на Македонија, Зоран Заев од Штип порача дека нема ништо против вечерашниот опозициски протест и порача дека внимателно ќе ги слушне пораките што ќе бидат испорачани од него.