Стотина граѓани денеска се собраа пред Владата за да дадат поддршка на граѓанските иницијативи од Југоистокот кои денеска во Валандово протестираат против рудниците Казандол, Иловица и Боров дол.
Како што велат тие, не се разочарани од малата излезност на протестниот за поддршка бидејќи сепак ова било само симболичен собир во знак на поддршка. Помеѓу присутните денеска беа и Бранимир Јовановиќ од Министерството за финансии, пратеничката Ивана Туфекџиќ, шефот на Кабинетот на градоначалникот на скопје, Никола Нааумовски како и Горан Милевски.
„Овде сме собрание да го поддржиме протестот во Валандово за изградбата на рудникот во Казандол. Тоа е сериозен проблем, како еколошки така и хуман, од секој аспект. Ќе се наруши котлината, подземните води, здравјето кај граѓаните и народот си го кажа своето на референдумите…нас не загрижува што оваа Влада се уште јасно не се изјаснила за рудниците“, вели Стојан Лешоски од „Еко Свест“, кој денеска присуствуваше на протестот.
Тој потсетува дека во екот на предизборието, Владата вели дека нема да има изградба на рудници, но за сега сеуште јавно не излегла со став за да ги расчисти сомнежите дека „рудниците на смртта“, како што ги нарекуваат активистите, ќе се изградат.
„Како граѓанска организација не треба да бидеме консултирани во однос на она што ќе биде преземено како крајни чекори, за тоа каков ќе биде исходот од активностите. Сметаме дека експертите треба да кажат зошто треба ден побрзо да се затвори тој комплекс и зошто не треба да се отвори таков комплекс во еколошки чиста околина. сметаме дека експертите треба да излезат со свое видување и со една детална анализа за тоа што знаеме дека фактите се на наша страна“, вели Даниел Мирчевска од „Спас во Валандово“.
Како што дополнува таа, самото тоа што елаборатот за изградбата предвидува евакуација на населението кое е најблиску до областа, зборува за опасност и ризикот дека ќе бидат загадени подземните води како и животната средина а со тоа и здравјето на луѓето, како и земјоделските производи од Југоистокот.
Собирот траеше речиси еден час, а присутните делеа летоци на кои пишуваше „Стоп за Казандол“.
Во исто време протестен марш се одржува и во Валандово. Таму неколку стотици граѓани со транспаренти „Стоп за Казандол“, „Не сакаме рудници на смртта“, „Ѕинго оди си од Валандово“ порачаа дека ќе се борат против изградбата и започнувањето со работа на овие рудници.