Два протестa се одржаа вечерва во центарот на Софија. Едниот во одбрана на националниот интерес на Бугарија во Македонија најавен како митинг-концерт организиран од партијата ВМРО, а другиот го запре сообраќајот на жолтата калдрма пред зградата на Собранието. Тој е во организација на најмалата парламентарна партија Вазраждане и инсистира на оставка на Владата.
Приврзаниците на ВМРО во т.н „триаголник на моќта“ вееја бугарски знамиња со плакати: „Киро поднеси оставка“, „Мезија, Тракија, Македонија“, „Одбрани ја Бугарија“.
– Ова е предупредување за митинг. Имаме информации дека на 24 овој месец владата на Кирил Петков се подготвува да го укине ветото за почеток на преговорите за членство на Македонија во ЕУ. Доколку тоа се случи ќе ја блокираме цела држава, рече Александар Сиди од ВМРО.
На другиот крај околу споменикот на Цар Освободител, добро опремени поддржувачи со плакати и знамиња бараа оставка од Владата и скандираа „НАТО надвор“.
Според нив, владата на Кирил Петков не успеала да управува со земјата и во последните месеци повеќе време потрошила на војната во Украина отколку на домашните проблеми во Бугарија. Од партијата на Костадин Костадинов изразија став дека Петков треба да си поднесе оставка, да се одржат нови избори.
На споменикот пред Народното собрание беше закачен голем транспарент со натпис „Ја закопаа Бугарија“.