Јулијан Дракслер ја има главната улога во првата трансфер бомба на зимскиот преоден рок. Иако фудбалскиот пазар ќе биде отворен по само неколку дена, сепак, германскиот репрезентативец од Волфсбург ја продолжува кариерата во ПСЖ за сума од 36 милиони евра.
Веста за успешно завршената зделка меѓу францускиот клуб и бундеслигашот ја објавија угледните „Лекип“ и „Билд“ по што потврди почнаа да стигнуваат од сите страни. Медиумите пишуваат дека фудбалерот се нашол во немилост во Волфсбург по изминатите месец дена по конфликтот со поранешниот тренер Дитер Хекинг и со директорот Клаус Алофс. Инсистираше да биде продаден за што беше и отстранет од првата екипа, но, сепак, на крајот заврши како што посакуваше.
Волфсбург е на позитивна нула со Јулијан Дракслер кој беше најскап играч во историјата на клубот. Меѓу „волците“ беше ангажиран како замена за Кевин де Брујн, но остана далеку од ефект на белгискиот репрезентативец. Клубот, пред година ипол, плати 36 милиони евра на Шалке за неговиот потпис и сега успеа да ја извлече истата сума од ПСЖ што како обесштетување ја издвои на тимот од Гелзенкирхен.
Дракслер потпиша четиригодишен договор со ПСЖ според кој ќе заработува девет милиони евра по сезона или двојно повеќе од годишната плата што ја имаше во Волфсбург. Голем удел во трансфер на Германецот имаше Патрик Клајверт, директор на францускиот гигант.