Рускиот претседател Владимир Путин го отвори фудбалскиот Куп на конфедерации, а имаше прилика да ужива и во триумфот на „зборнаја“ над Нов Зеланд со 2:0 во Санкт Петербург во првиот меч на турнирот. Домашната селекција поведе со автоголот на Боксал во 31 минута, печат на победата стави Смолов во 69 минута иако не искористи уште неколку одлични шанси за поубедлива радост во што ги спречи противничкиот голман Стефан Мариновиќ.
Во групата А утре (17 ч.) ќе играат уште Португалија и Мексико. Централниот термин, пак, од 20 часот им е отстапен на Камерун и Чиле во групата Б.
Осум репрезентации се поделени во две групи на натреварувањето што Светската фудбалска асоцијација (ФИФА) го востанови во 1992 година. Натпреварите на Купот на конфедерации 2017 ќе се играат на четири стадиони во Русија. Во полуфинале ќе продолжат најдобрите две од секоја група, мечот за титулата е закажан на 2 јули.
Куп на конфедерации 2017
Група А
Русија – домаќин на турнирот и на СП 2018
Нов Зеланд – победник на Купот на нации во зоната Океанија во 2015 година
Португалија – победник на ЕП 2016
Мексико – победник на Купот на Северна и Средна Америка и Карибите во 2015 година
Група Б
Камерун – победник на Купот на африкански нации во 2017 година
Чиле – победник на Копа Америка во 2015 година
Австралија – победник на првенството на Азија во 2015 година
Германија – победник на СП 2014