Нема повеќе непоразени екипи во женската ракометна Лига на шампиони. За тоа се погрижи екипата на Будуќност која попладнево во Скопје триумфира над ЖРК Вардар со 31:28, резултат со кој и „црвено-црните“ славеа на гостувањето во Подгорица на 29 јануари.
„Почетокот на денот беше тежок за нас по веста за смртта на таткото на Кликовац. Со мислите бевме со Андреа и се обидовме да одиграме најдобро што можеме. Но, тоа не беше доволно, а кога играте против екипа каква е Будуќност мора да бидете 100 отсто фокусирани. Не е страшно што загубивме. Сè уште сме први на табелата и со две победи ќе останеме на чело на табелата“, истакна Давид Дејвис, тренер на ЖРК Вардар.
Свое шоу во СЦ „Јане Сандански“ имаше Катарина Булатовиќ. Црногорската репрезентативка постигна 14 гола и беше, убедливо, централна фигура во мечот. Неагу додаде шест гола за екипата од Подгорица колку што постигна и Андреа Пенезиќ, најефикасната вардарка денеска. Лакрабер и Лекиќ реализираа по пет пати.
„Сакавме овој меч да го одиграме и посветиме на Кликовац, но, за жал, не успеавме да победиме“, рече Словенката Мавсар.
Гостинскиот тренер со помешани чувства по натпреварот.
„Од една страна сум среќен поради победата на Будуќнотс, од друга сочувствувам со загубата на Андреа. Претпоставувам колку им беше тешко да играат без неа, но и мене да ја водам екипата бидејќи 14 години ја познавам Кликовац. Успеав некако да се средам, а верувам дека така ќе биде и со Вардар во последните две кола“, посочи Драган Аџиќ.
Вардарки остануваат лидери во конкуренцијата 1 на две кола до крај на групната фаза. Но, сега имаат идентичен број на бодови (13) како и тимот на Ференцварош кој викендот пред своја публика славеше над Мец со 29:23. Македонскиот првак во наредното коло ќе гостува во Франција и во последното го дочекува Тирингер. Екипата од Подгорица во недела ќе игра на домашен терен со Астраханочка и на 11 март ќе оди на мегдан на Унгарките во Будимпешта.
ЖРК Вардар – Будуќност 28:31 (16:17)
СЦ „Јане Сандански“ во Скопје. Гледачи: 4.500. Судии: Карина Кристијансен и Лине Хеселдал Хансен од Данска.
ЖРК Вардар: Лејно, Суслина, Песоа, Радичевиќ 2, Херем 2, Мавсар 2, Дамњановиќ 2, Лазович 2, Алтхаус 2, Илјина, Пенезиќ 6, Лакрабер 5, Лекиќ 5, Ристовска. Тренер: Давид Дејвис.
Седмерци: 3/3. Исклучувања: 6 минути. Технички грешки: 12.
Будуќност: Бабовиќ, Батиновиќ, Ујкиќ, Неагу 6, Јауковиќ, Плетикосиќ, Цвијиќ 2, Ирман 3, Маловиќ, Булатовиќ 14, Павичевиќ, Рамусовиќ, Нововиќ 3, Ахрук 2, Грбиќ 1. Тренер: Драган Аџиќ.
Седмерци: 6/8. Исклучувања: 6 минути. Технички грешки: 10.
Лига на шампиони
Група 1
Резултати, 8 коло
ЖРК Вардар – Будуќност 28:31
Астраханочка – Тирингер 26:24
Ференцварош – Мец 29:23
Табела: ЖРК Вардар 13, Ференцварош 13, Будуќност 10, Мец 6, Тирингер 4, Астраханочка 2.
Идно коло (5 март): Мец – ЖРК Вардар, Тирингер – Ференцварош, Будуќност – Астраханочка.
Група 2
Есбјерг – Митјиланд 22:21
Крим – Ѓер 17:34
Ларвик – ЧСМ Букурешт 35:33
Табела: Ѓер 13, Ларвик 10, Митјиланд 8, ЧСМ Букурешт 7, Крим 6, Есбјерг 4.
Идно коло: ЧСМ Букурешт – Крим (3 март), Митјиланд – Ларвик (4 март), Ѓер – Есбјерг (5 март)