Ракометарите на Вардар ја запишаа и седмата победа во низа во Лигата на шампиони, втора во нова сезона. Успешниот почеток на мисијата насловена како одбрана на титулата доби продолжение од минатиот викенд во Плоцк. „Црвено-црните“ го совладаа Нант со 27:23 (полувреме 14:10) во првиот настап на домашен терен како европски прваци и останаа на врвот на табелата во групата А.
Фереира Мораеш со шест гола беше најефикасен попладнево во СЦ „Јане Сандански“, пет додаде Даинис Кристопанс, по четири реализираа Иван Чупиќ и Тимур Дибиров колку и Ниокас, Гурбиндо и Балагер кај францускиот состав за кој Кире Лазаров остана со мала минутажа и без погодок.
„Нант одигра добар и брз ракомет во Скопје. Неговите играчи го пронајдоа ритамот во второто полувреме и ни создадоа проблеми преку неколкуте контранапади. Задоволен сум како се заврши на крајот знаејќи дека имаме работа со одличен тим кој го победи и Монпелје и ПСЖ. Тешка победа“, коментира Раул Гонзалез, менаџерот на Вардар и селектор на Македонија.
Мечот со Нант наликуваше на оној против Висла. Вардарци само во три наврати во првото полувреме имаа негатива од еден гол (0:1, 2:3, 6:7), во сиот преостанат тек на средбата беа во позитива. Но, влезот во вториот дел беше како пресликан од Полска. Па, наместо сигурно одржување на предноста од пет гола (19:14), Нант со серија од 4:0 покажа заби и во 41 минута се доближи на гол заостанување (19:18), меѓутоа не и за одржување на резултатската тензија.
„Црвено-црните“ одговорија со 5:2 за враќање на плус четири на семафорот (24:20) во 48 минута во која Штербик одбрани и пенал за дополнително одржување на будност меѓу соиграчите. Завршните десетина минути донесоа по три гола на обете страни за бодовите, сепак, да останат во Скопје.
Нареден ривал на Вардар е ППД Загреб. Дуелот со хрватскиот шампион е во недела (1 октомври) во СЦ „Јане Сандански“ од 17 часот.
Вардар – Нант 27:23 (14:10)
Сала: СЦ „Јане Сандански“. Гледачи: 5,050. Судии: Петер Бруновски и Владимир Канда (двајцата од Словачка).
Вардар: Штербик (11 одбрани, 2 седмерца), Ѓорѓески, Стоилов 1, Поповски, Кристопанс 5, Фереира Мораеш 6, Македа, Абутовиќ, Кањелјас 2, Циндриќ 2, Чупиќ 4, Дибиров 4, Шишкарев, Борозан 3, Војводиќ, Марсениќ. Тренер: Раул Гонзалез.
Седмерци: 4/5. Исклучувања: /.
Нант: Думоли, Сифер, Лагар 1, Фалувеги 2, Ниокас 4, Клер 1, Буриќ 2, Клајн, Пемалбе 1, Турно 2, Фелио, Емоне 1, Матулиќ 1, Лазаров, Гурбиндо 4, Балагер 4. Тренер: Тиери Анти.
Седмерци: 1/3. Исклучувања: 2 минути.
Лига на шампиони, 2 коло
Група А
Вардар – Нант 27:23
Барселона – Кристијанштад 31:29
Рајн Некар Левен – Висла Плоцк 31:27
ППД Загреб – ПИК Сегед (во тек)
Табела: Вардар 4, Рајн Некар Левен 3, Барселона 3, Нант 2, ППД Загреб 1 (-1), Кристијанштад 1, Висла Плоцк 0, ПИК Сегед 0 (-1).
Група Б
Веспрем – Фленсбург 28:27
Алборг – Целје (недела/16,50 ч.)
ПСЖ – Мешков Брест (недела/17 ч.)
Виве Кјелце – Кил (недела/18,30 ч.)
Група Ц
Динамо Букурешт – Горење Велење 26:27
Елверум – Скјерн 27:32
Адемар Леон – Шафхаузен (недела/17 ч.)
Група Д
Чеховски медведи – Монпелје 24:28
Металург – Бешикташ (недела/17 ч.)
Спортинг Лисабон – Мотор Запорожје (недела/19 ч.)