Историјата се повторува за ракометарите на Вардар. Победничката низа лани ја прекина Колдинг, оваа година го стори тоа ППД Загреб. Хрватскиот првак ги совлада „црвено-црните“ со 28:27, со пресврт во второто полувреме, за прва победа во групата Б во Лигата на шампиони. За македонскиот, пак, е прв пораз во ЛШ и воопшто во сезоната.
Јунак на средбата беше домашниот голман Иван Стевановиќ. Заврши со 14 интервенции од кои 10 во второто полувреме во кое вардарци недозволиво многу се изнапромашуваа. Најефикасен играч на средбата беше неговиот клупски колега Марковиќ со 7 гола, Душебаев постигна 5 за поразената екипа.
Вардар одигра на потребното ниво во првот дел. Составот на Раул Гонзалез функционираше според замислите. Решително и задоволително пробојно во напад, цврсто во одбрана и на пауза се замина со убедливи плус 5 (12:17) што во тие моменти, гледано од страна и имајќи ги предвид околностите на теренот, изгледаше како завршена работа. Можеби истото го помислија и самите ракометари, па продолжението доби сосема поинаков тек.
Но, она што следуваше, сепак, донесе апсолутно неочекуван заплет и конечен расплет во прилог на домашните. Логично се наметнува прашањето како е можно да се случат осцилации (игра, реализација, одбрани на голмани) во толкава мера за така краток временски период за губење на натпревар што по три четвртини изгледаше добиен со единствена енигма – со колкава разлика.
На сцена стапи Стевановиќ кој ги спушти „ролетните“ на голот, а неговите одбрани беа мотивирачка сила во нападот. Како што домашните погодуваа, така гостите во Скопје влегуваа во „црна дупка“ што на крајот и ги проголта. Се промашуваа зицери, се промашуваа пенали, се промашуваше од бековските позиции. Постот на македонскиот шампион траеше пет минути и од 18:23 „плинарите“ се доближија на 23:24.
Навидум здодевниот меч одеднаш доби неизвесна нишка и драма. Вардарци успеаја, по тајм аутот, да врзат два гола и да поведат со 23:26. И штотуку се помисли дека работите си доаѓаат на свое, домашните почнаа со решавачкиот удар. Со нова серија од 5:1 успеаја да го свртат резултатот во своја корист (28:27) и да го одржат до звукот на сирената.
Последните два обида за реми ги имаше Душебаев. Играчот кој дотогаш погоди се што шутна во натпреварот, во последната минута промаши. Најпрво во контра ја „стрелаше“ стативата, потоа и Стевановиќ ја одби заканата од преку девет метри за крај на надежите на вардарци. Нова прилика за рекордни, пет, победи во низа ќе треба да бараат во поблиска или подалечна иднина.
ППД Загреб – Вардар 28:27
Полувреме: 12:17. Сала во Загреб. Гледачи: 6.000. Судии: Андро Марин (Шпанија) и Игнасио Гарсија Серадилја (Шпанија).
ППД Загреб: Стевановиќ, Скок, Ерес, Контрец 2, Вори 1, Цингесар 1, Шебетиќ 4, Марковиќ 7, Раковиќ, Миклавчич , Хорват 4, Ј. Валчиќ 3, Јотиќ 2, Т. Валчиќ, Мандалиниќ 4, Маркоски. Тренер: Силвио Ивандија.
Седмерци: 1/1. Исклучувања: 4 минути. Технички грешки: 12.
Вардар: Штербик, Милиќ, Стоилов, Мораеш, Македа 2, Деревен 2, Карачиќ, Душебаев 5, Абутовиќ, Кањелас 1, Циндриќ 3, Чупиќ 4, Дибиров 4, Шишкарев 1, Борозан 3, Марсениќ 2. Тренер: Раул Гонзалез.
Седмерци: 1/4. Исклучувања: 4 минути. Технички грешки: 10.