Ѓер ја освои третата титула во ракометната Лига на шампиони, ЖРК Вардар ќе мора да причека на првата. Унгарскиот тим, кој важи за учесник со најголем буџет во елитното натпреварување, го совлада македонскиот првак со 31:30 по продолженија во финалната пресметка во „Ласло Пап“ арена во Будимпешта што траеше 70 минути. Победникот се решаваше низ двете петминутни екстра периоди по нерешените 26:26 во основниот час игра. Бронзениот медал го понесе ЧСМ Букурешт кој совлада Будуќност со 26:20 во меч за третото место.
Гербиц со седум гола и Мерк и Грот со шест беа лидери на Ѓер меѓу чии стативи се истакна фантастичната норвешка голманка Кари Алвик Гримсбо. По шест гола за вардарки реализираа Алтхаус и Лакрабер, по два помалку од нив прослација Лекиќ, Пенезиќ и Радичевиќ.
Екипата со најдобра одбрана ја совлада екипата со најдобар нападот во Лигата на шампиони во оваа сезона. Ѓер одигра страшно добро во дефанзива, особено во првото полувреме во кое „црвено-црните“ не постигнаа гол цели десет минути. Мрежата на Гримсбо како да беше маѓепсана за вардарки, период во кој домашните успеаја до се одлепат на три гола и со 15:12 да заминат на одмор.
Продолжението на теренот ги донесе сите предуслови за давање на идентичен одговор. Вардарки ја стегнаа одбраната, кон средината на второто полувреме се разбрани и Мајда Пешоа, затворени беа Анита Гербиц, девојката со решение за секоја ситуација, и Нора Мерк, а во нападот почнаа да стигнувааат топки до Ања Алтхаус на линијата од шест метри. По водството на почетокот со 1:0 и 3:2, македонскиот шампион дури во финишот успеа до резултатски егал. За израмнување на 26:26 се погрижи Тамара Мавсар, па дури и напад за победа што, сепак, не беше реализиран по досуденото пробивање на Унгарките.
Ѓер во продолженијата наликуваше на изданието од првото полувреме. Ја презеде иницијативата и водството на семафорот, а ЖРК Вардар и покрај желбата, упорноста и смиреноста, не успеа да ја пролонгира промоцијата на новиот владетел во европскиот женски ракомет.
Простор за разочарување нема. По трите бронзени медали, „црвено-црните“ за првпат заиграа во финале во кое ја доживеаја судбината на Кометал Ѓ.П. И ѓорчепетровки беа поразени од Слагелсе во премиерното учество во меч за титулата во ЛШ по стариот натпреварувачки формат (финалето се играше по принципот дома-гости), за веќе во наредната сезона да стигнат до најголемиот успех во клупската историја по средбите со Ференцварош.
Ѓер – ЖРК Вардар 31:30 по продолженија – 26:26 во основниот дел (полувреме 15:12)
Арена: „Ласло Пап“ во Будимпешта. Гледачи: 12.000. Судии: Карина Кристијансен и Лине Хеселдал Хансен (двете од Данска).
Ѓер: Киш, Гримсбо (16 одбрани), Кнедликова 2, Худак, Харсфалви, Мерк 6, Корсош, Гербиц 7, Пал, Аморим Талеска 3, Томори 3, Грот 6, Брох 2, Боди 2, Пухалак, Елгауи. Тренер: Амброс Мартин.
Седмерци: 3/3. Исклучувања: 12 минути. Технички грешки: 6.
ЖРК Вардар: Лејно (3 одбрани), Суслина (4 одбрани), Пешоа (5 одбрани), Радичевиќ 4, Кликовац, Херем 2, Мавсар 3, Дамњановиќ, Лазович 1, Алтхаус 6, Пенезиќ 4, Човиќ, Лакрабер 6, Хмирова, Лекиќ 4, Ристовска. Тренер: Ирина Дибирова/Едуард Кокшаров.
Седмерци: 4/5. Исклучувања: 10 минути. Технички грешки: 3.