Фуриозна партија на европскиот машки ракометен првак за победничко збогум со Лигата на шампиони до февруари. Вардар го декласира Кристијанштад на домашен терен со 31:15 (полувреме 14:8) и го одработи 15. меч во низа без пораз во елитното натпреварување, вкупно 20. во серија на сите фронтови и, што е најважно, направи нов исчекор до директен пласман во четврт-финалето.

Шестата епизода од македонско-шведска ракометна пресметка заврши како и претходните пет. „Црвено-црните“ го задржаа максималниот ефект со ривалот од континенталниот север, а за текот на последниот судир е доволно да се истакне Арпад Штербик. Вардаровиот голман ги исфрустрира противничките играчи и на крајот забележа повеќе одбрани одошто тие сите заедно голови. Девет удари одбрани во воведните 30 минути кон кои додаде уште осум во продолжението за вкупно 17 или две повеќе од вкупниот број на реализации на составот на Ола Линдгрен.

Најефикасен во мечот беше Тимур Дибиров со седум погодоци, Карачиќ запиша пет, а Македа и Чупиќ по четири во убедливиот триумф на Вардар. Соренсен беше прв стрелец во порзената екипа со четири гола.

Натпреварите во машката Лига на шампиони ќе продолжат во првата половина на февруари во 2018 година. Прв ривал на вардарци по паузата ќе биде Барселона во „Блауграна“. Во вакуум периодот за клупски активности ќе се одржи Европското првенство во Хрватска (12-28 јануари). Меѓу 16 репрезентации учеснички и македонската која ќе игра во групата Ц со селекциите на Германија, на Црн Гора и на Словенија.

Вардар – Кристијанштад 31:15 (14:8)

Сала: СЦ „Јане Сандански“ во Скопје. Гледачи: 5.000. Судии: Тарас Куз и Виктор Жоба (двајцата од Украина).

Вардар: Штербик (17 одбрани, 1 седмерец), Милиќ, Стоилов, Криштопанс, Мораеш Фереира 2, Македа 4, Карачиќ 5, Абутовиќ, Кањелјас, Циндриќ 3, Чупиќ 4, Дибиров 7, Шишкарев 1, Борозан 2, Војводиќ 1, Марсениќ 2. Тренер: Раул Гонзалез.

Седмерци: 4/5. Исклучувања: 8 минути.

Кристијанштад: Л. Ларсон (3 одбрани), Капелин (5 одбрани), Липовац, Арнарсон, Хенингсон 3, Соренсен 4, Нилсен, Лагергрен, Ј. Ларсон, Хален 3, Фрејман, Першон 1, Кринц 2, Јонсон 2, Ериксен. Тренер: Ола Линдгрен.

Седмерци: 1/2. Исклучувања: 10 минути.