Ракометарите на Вардар сè уште имаат шанси за прво место во Б конкуренцијата што значи и директен пласман во четврт-финалето во Лигата на шампиони. Во завршницата на групната фаза (остануваат уште пет кола) влегуваат од четвртата позиција на табелата со 12 бода, два помалку од лидерот и бранител на титулата Кјелце и еден од ПИК Сегед и Рајн Некар Левен на второто, односно, третото место. Затоа е важен секој бода од можните 10 до крајот, а првиот настап по зимската пауза го имаат попладнево на домашен терен против ППД Загреб (17.30 ч., СЦ „Јане Сандански“).
„Треба да одиграме со 100 отсто. Не се сомневам дека ќе биде така бидејќи сум задоволен како трениравме цела недела. Се надевам дека ќе играме пред полни трибини затоа што поддршката нѝ е потребна. Ако сакаме да успееме, дома не смееме да загубиме“, вели Раул Гонзалез, тренер на вардарци.
Денешната средба на Вардар и ППД Загреб е четврта меѓусебна во оваа сезона. Хрватскиот првак славеше како домаќин во СЕХА лигата со 28:26 и во ЛШ со 28:27 во петтото коло кога беше прекината победничката низа на „црвено-црните“. Македонскиот, пак, го доби дуелот во Скопје во рамки на регионалното натпреварување со 32:31.
„Кога се подготвуваме за меч во Лигата на шампиони, тоа изгледа како да се подготвуваме за финале. Фокусирани сме на нас, противникот го респектираме без притоа да се оптоваруваме во кој состав ќе игра“, додава вардаровиот стратег.
Покрај трите натпревари од септември наваму, Вардар и ППД Загреб се пресметаа уште шест пати претходно. „Црвено-црните“ имаат две победи (33:24 и 32:29) за разлика од трите на „плинарите“ (30:25, 25:22 и 34:26 – единствена во Скопје), а еден меч заврши без победник (28:28). Металург го совлада хрватскиот состав во средата во СЕХА конкуренцијата со 25:22, но вардарци со порака дека нема да дозволат тој меч да ги залаже, а ќе ги потиснат и останатите меѓусебни.
„Да заборавиме се што досега сме играле против нив. Да заборавиме и дека загубија од Металург. Концентрирани сме на ова што нè очекува денеска. Можеби некој ќе помисли дека ќе биде лесно со што јас не се согласувам. Ќе дадаме максимум да победиме. Не смееме да дозволиме нов кикс на домашен терен како со Рајн Некар“, предупредува Стојанче Стоилов.
Веќе се одиграа два меча од 10. коло во групата Б. Рајн Некар Левен во дербито го победи Кјелце со 28:25, а Мешков Брест пред своите гледачи го совлада ПИК Сегед со 25:23. Покрај мечот Вардар – ППД Загреб денеска ќе играат и Целје – Кристијанштад.