Ракометарките на ЖРК Вардар ја прославија и четвртата победа во низа над Митјиланд. Овојпат во првиот четвртфинален дуел во Лигата на шампиони и тоа на гостински терен. Конечни 28:26 за „црвено-црните“ девојки кои, по Ларвик, се втори што триумфираа во Икаст за огромен чекор кон Фајнфор турнирот во Будимпешта.
„Имавме проблеми во второто полувреме. До израз дојде Сабине Енглерт со нејзините одбрани покажувајќи ја својата класа, а противничките ракометарки беа успешни во нападите. Задоволни сме од исходот. Имаме два гола предност пред реваншот на домашен терен“, изјави Андреа Лекиќ која доби мала минутажа поради повредата што ја оддалечи од тренинзите во изминатите 25 дена.
Андреа Пенезиќ со седум гола беше најефикасна на средбата. Хрватската репрезентативка имаше најголема поддршка во нападот од Александра Лакрабер со пет погодоци и Словенката Барбара Лазович со четири. Одлична на голот беше и Амандин Лејно со 12 интервенции.
Митјиланд, пак, имаше прв стрелец во Трине Остергард Јенсен која погоди пет пати, триото Јоргенсен, Блом и Бургард постигнаа по четири, а Енглерт одбрани 11 удари од вардаровите ракометарки кои во два наврата во мечот водеа со седум разлика.
Реваншот меѓу ЖРК Вардар и Митјиланд е во сабота во Скопје.
Митјиланд – ЖРК Вардар 26:28 (12:18)
Спортска сала во Икаст. Гледачи: 2.000. Судии: Петер Хорват и Балаш Мартон (Унгарија).
Митјиланд: Тирн, Енглерт (11 одбрани), Елебек, Јоргенсен 4, Блом 4, Петерсен, Јакобсен 1, Кристијансен 3, Фрис 2, Линден, Педерсен 3, Аугустесен, Јенсен 5, Бургард 4, Јонсдотир. Тренер: Кристијан Кристијансен.
Седмерци: 1/1. Исклучувања: 12 минути. Технички грешки: 20.
ЖРК Вардар: Лејно (12 одбрани), Суслина, Песоа, Радичевиќ 3, Кликовац, Херем 2, Мавсар 2, Дамњановиќ 1, Лазович 4, Алтхаус 1, Пенезиќ 7, Човиќ 1, Лакрабер 5, Хмирова, Лекиќ 2, Ристовска. Тренер: Ирина Дибирова.
Седмерци: 1/2. Исклучувања: 14 минути. Технички грешки: 11.
Лига на шампиони
Четврт-финале, резултати
Митјиланд – ЖРК Вардар 26:28
Мец – Ѓер 32:31
Будуќност – Ларвик 31:17
ЧСМ Букурешт – Ференцварош 30:25