Полина Кузнецова (30) е нов лик во соблекувалната на ЖРК Вардар. Руската репрезентативка и македонскиот женски ракометен првак потпиша договор на две години со можност за негово продолжување и во Скопје доаѓа како замена за Норвежанката Камила Херем и Словенката Тамара Мавсар кои по завршување на сезоната спогодбено ја раскинаа соработката.
„Договорот со Вардар е на две години. Одамна имам желба да заиграм во странство што, конечно, се оствари. Пресреќна сум што ќе бидам дел од така професионален клуб. Ќе дадам максимум за оправдување на укажаната доверба, верувам во уште поголем личен напредок во новата средина и се надевам дека ќе бележиме добри игри, ќе имаме добри резултати и ќе освојуваме титули“, изјави Кузнецова за интернет страницата на Руската ракометна федерација.
Кузнецова игра на позицијата лево крило. Висока е 168 сантиметри и меѓу „црвено-црните“ пристигнува како слободна ракометарка. Минатата сезона ја мина во тимот на Кубан Краснодар, но вториот дел го пропушти поради повреда и подолг период на рехабилитација што беше неопходен по хируршката интервенција во декември. Претходно, во летниот период во 2016 година, беше дел од селекцијата на „зборнаја“ која го освои златниот медал на олимписките Игри во Рио де Жанеиро. Одличје со ист сјај има и од СП 2005 во Русија и од СП 2007 во Франциа и сребро од ЕП 2006 во Шведска.
Со ангажманот на Кузнецова се зголемува и руската ракометна колонија во СЦ „Јане Сандански“ на осум лица. Дел од машката екипа на „црвено-црните“ се Тимур Дибиров и Данил Шишкарев, за женската веќе подолго време играат Ина Суслина и Татана Хмирова, за нивни тренер неодамна беше назначена Ирина Полторацкаја, спортски директор во клубот е Едуард Кокшаров (носител на злато од Игрите во Сиднеј), а газда на двата клуба е бизнисменот Сергеј Самсоненко.