Работа, работа и само работа планира селекторот на машката ракометна репрезентација на Македонија, Раул Гонзалез, за неделата на ЕХФ од 23 до 29 октомври. Тренинзи, воигрување и тим билдинг е во агендата на Шпанецот за националите за кои овојпат нема предвидено никакви натпреварувачки активности. Но, и без нив, собирот ќе биде корисен и се става во функција на Европското првенство во Хрватска од 12 до 28 јануари во 2018 година во кое „црвено-жолтите“ ќе имаат пресметки со Германија, со Црна Гора и со Словенија во рамки на групата Ц (Загреб).
За таа цел Гонзалез објави список со 21 ракометар за шесте работни дена во Скопје. Меѓу нив по еден повратник, ако може така да се каже за Немања Прибак, и дебитант (Јане Цветковски). Ако за бекот на Бешикташ е запозната јавноста и не е изненадување што се враќа во замислите на предводникот на националниот тим, тогаш 30 годишниот голман на шведски Истадс е енигма.
Тинекс Пролет е единствениот клуб за кој настапувал Цветковски во домашната сцена. Голот на македонскиот суперлигаш го бранеше од 2007 година до 2014 година пред да заплива во интернационални води. Прва негова дестинација во странство беше словачки АГРО Тополчани (сезона 2014-2015), потоа Босна (сезона 2015-2016) и Хелсингборг (сезона 2016-2017) пред да потпише за двократниот шампион од југот на Шведска од 1976 година и 1992 година.
Список на повикани ракометари во мапката репрезентација на Македонија за ЕХФ неделата од 23 до 29 октомври
Голмани: Борко Ристовски (Барселона/Шпанија), Никола Митревски (Доброгеа Констанца/Романија), Златко Даскаловски (Политехника Темишвар/Романија), Јане Цветковски (Истадс/Шведска)
Крила: Дејан Манасков (Веспрем/Унгарија), Гоце Ојлески (Еурофарм Работник), Гоце Георгиевски (ЧСМ Букурешт/Романија), Мартин Поповски (Вардар)
Бекови: Филип Талески (Рајн Некар Левен/Германија), Филип Кузмановски (Металург), Марко Нелоски (Кобург/Германија), Филип Лазаров (Бешикташ/Турција), Кирил Лазаров (Нант/Франција), Мартин Велковски (Металург), Филип Миркуловски (Вецлар/Германија), Немања Прибак (Бешикташ/Турција)
Пикери: Стојанче Стоилов (Вардар), Никола Маркоски (Орошази/Унгарија), Жарко Пешевски (Металург)
Дефанзивци: Велко Маркоски (Доброгеа Констанца/Романија), Аце Јоноски (Ратинген/Германија)