Македонскиот женски ракометен првак ЖРК Вардар посакува трансфер во главната групна фаза во Лигата на шампиони со максимален ефект. Засега го има по петте меча (по два против Ференцварош и Ларвик и еден со Тирингер), но интенција е да го задржат и по вечерашниот реванш со бундеслигашот (СЦ „Јане Сандански“, 19 ч.) во шестото, последно, коло во Ц конкуренцијата.
„Особено важен меч за нас. Бодовите ни требаат бидејќи сакаме што повеќе да пренесеме во наредната фаза. Не ги потценуваме Тирингер иако во Германија го победивме со осум гола разлика. Имаат добра екипа и, секако, и тие како и ние посакуваат бодови за подобар влез во главната фаза. Можам да ветам борба во текот на сите 60 минути и надеж дека ќе биде доволна за радост на навивачите“, порача Ирина Дибирова, тренер на ЖРК Вардар.
Слична најава за натпреварот и од црногорската репрезентативка, Јованка Радичевиќ која нагласува потреба од максимално сериозен пристап во обидот за впишување на нови бодови на контото на „црвено-црните“.
„Ништо не значи победата во Германија ако и сега не ги сфатиме сериозно. Нема да биде лесно, но победата, сепак, е единствена опција за нас кко што е случај во секој натпревар. Мора да останеме смирени и фокусирани бидејќи Тирингер е екипа што игра на исто ниво без оглед дали е во улога на домаќин или гостин. Клучот за успех ќе биде играта во одбрана“, изјави Радичевиќ во пресрет на мечот.
Вардарки ќе атакуваат вечерва на шеста победа во групата Ц без поддршка на повредените Андреа Лекиќ и Мирјета Бајрамовска. Доколку успеат во победничките намери, „црено-црните“ ќе пренесат осум бода во главната фаза во ЛШ во која во јануари и февруари ќе се соочат со најдобрите три екипи од групата Д, позиции што моментно ги држат Мец, Битигхајм и Будуќност.