Хрватска е на прагот на елиминација на Европското првенство во ракомет за жени во Шведска по убедливиот пораз од Норвешка, бранител на титулата, со убедливи 34:16 (15:9) во второто коло во групата Д. Исходот и не е изненадување ако се има предвид досието на Норвежанките кои ја имаат најтрофејната селекција во истроријата на ракометната игра. Имаат шест олимписки медала и од кои два златни, девет мундијалски одличја од кои три се златни и шест пати беа континентални шампионки. Оттука и разликата против „коцкестата“ селекцијата што минува низ фаза на подмладување беше евидентна овојпат.
Марит Фјафјорд со шест гола и Нора Морк и Сана Сорберг постигнаа по пет беа најефикасни во победничкиот тим. Морк имаше и причина плус за славје. Ја проби границата од 400 погодоци во кариерата во настапите за Норвешка. Андреа Пенезиќ со четири гола и Екатерина Немашкало со три беа предводници во составот на Горан Мрѓен. Хрватска, сепак, не е без шанси за место во главната рунда на турнирот за што е потребна победа од шест или повеќе гола разлика во мечот од третото коло со Романија. Романките, пак, славеа по 60. минути со Русија со 22:17.
Ѓурѓина Јауковиќ и Мајда Мехмедовиќ впишаа по седум реалиции и беа главни ликови во црногорската селекција во првиот триумф на шампионатот. Ако во првото коло Црна Гора беше „покуса“ за гол во мечот со Данска, во второто беше за гол „подолга“ од Чешка за конечни 28:27. Хрбкова со шест погодоци беше прв стрелец во чешкиот состав. Данска беше подобра од Унгарија со 23:19 во вториот меч во групата Ц и е сигурен учесник во наредната рунда.
ЕП 2016 – Шведска
Резултати, 2. коло
Група Ц: Данска – Унгарија 23:19, Чешка – Црна Гора 27:28. Табела: Данска 4, Чешка 2, Црна Гора 2, Унгарија 0
Група Д: Хрватска – Норвеша 16:34, Романија – Русија 22:17. Табела: Норвешка 4, Романија 2, Русија 2, Хрватска 0.
Денеска на ЕП 2016
Двојки, 3. коло
Група А: Шпанија – Словенија (18.30 ч.), Шведска – Србија (20.45 ч.)
Група Б: Германија – Полска (18.30 ч.), Холандија – Франција (20.45 ч.)