Еурофарм Работник ја слави премиерната победа во ракометната Лига на шампиони во клупската историја. Битолските „фармацевти“ во салата „Боро Чурлевски“ го совладаа фински Рихимаен Кокс со 31:30 (полувреме 17:13). Дебитантот во ЕХФ клупската елита беше подобар ривал и заслужено ги запиша првите бодови во групата Ц.

Но, предноста од четири гола на паузата не значеше комотно второ полувреме. Напротив. Составот на Стевче Алушовски и овојпат западна во „црни минути“, па залихата се топеше како што одминуваше време. Финците успеаја да креираат неизвесна завршница и дојдоа до 30:30, но Гоце Ојлески се погрижи за 31:30 и хепиенд за македонскиот претставник, откако и Никола Митревски го одбрани обидот за израмнување во „седум на шест“ нападот на Кокс.

Еурофарм Работник се искачи на четвртата позиција во групата Ц со два бода колку што има и екипата од Финска. Минималниот триумф на битолчани доаѓа по трите минимални порази во претходните рунди од Спортинг Лисабон (29:30), од Савехоф (24:25) и од Бидасоа Ирун (25:26).

Најефикасен ракометар на битолчани беше Украинецот Владислав Остроушко со осум гола, Гоце Ојлески додаде пет, а кружниот напаѓач од БиХ, Елмир Граѓан четири. Еурофарм Работник ќе игра на домашен терен и во наредното коло против словачки Татран Прешов на 20 октомври.