Вардар по вторпат ја „чисти“ Барселона во полуфиналните дуели на Фајналфор турнирите во ракометаната Лига на шампиони. По триумфот во 2017 година со 26:25, „црвено-црните“ попладнево во Келн повторно го елиминираа шпанскиот гигант со 29:27 и ќе играат против Веспрем во утрешното финале за титулата (18 ч.).
Вардарци добија загубен меч во „Ланксес арена“. На одмор заминаа со минус седум (9:16), но неверојатен, епски, пресврт се случи во второто полувреме. Македонскиот претставник ја затегна одбраната, демонстрира невиден карактер и срце и ја запре голгетерската машинерија од „Блауграна“ на само 11 гола.
Фантастична работа завршија сите до еден, без исклучок. Дејан Милосављев го одигра мечот на кариерата во дебитантскиот настап на завршните турнири и работното место меѓу стативите го напушти до дваесетина одбрани. Даинис Кристопанс ја „распара“ Барса во напад со десет гола, пет реализира Игор Карачиќ, четири Мораеш, три Чупиќ. По двапати во целта погодуваа Тимур Дибиров и Кристијан Дизингер, по еднаш „стрелаа“ Данил Шишкарев, Сташ Скубе и капитенот Стојанче Стоилов со чиј гол беше запечатена судбината на Каталонците.
Гомеш Алеиш беше најефикасен кај деветкратниот европски првак кој ќе мора да се помири со борбата за третото место во ЛШ за оваа сезона.