Поддршка од Русија, поделеност во Европската Унија (ЕУ), е расположението меѓу двете страни за евентуален дијалог меѓу Брисел и Москва.
Руската страна ги поддржува сите иницијативи што можат да го поттикнат дијалогот меѓу Брисел и Москва, откако такви предлози пристигнаа од лидерите на Европската унија.
– Позитивно оценуваме такви иницијативи. Рускиот претседател Владимир Путин го поддржува создавањето на механизам за дијалог и контакти меѓу Брисел и Москва, изјави денеска портпаролот на Кремљ, Дмитриј Песков.
Претходно, германската канцеларка Ангела Меркел изјави дека ЕУ треба да побара директен дијалог со Русија, а бројни медиуми денеска објавија дека ЕУ може да разгледа формат за евентуален самит меѓу лидерите на Унијата и рускиот претседател.
Премиерите, пак, на земјите членки на ЕУ се поделени околу тоа дали да се сретнат со рускиот претседател Владимир Путин, предлог што вчера го изнесоа Германија и Франција, во пресрет на самитот на Унијата во Брисел, јави агенцијата ДПА.
Прeдводејќи ги разговорите со нејзините 26 колеги, германската канцеларка Ангела Меркел кажа дека ЕУ треба да најде начини за влегување во директен дијалог со Русија, тврдејќи дека „конфликтите најдобро можат да се решат ако меѓусебно се разговара“. Другите земји, меѓутоа, се скептични кон пристапот и повикаа на внимателност.
– Ние не гледаме никаква радикална промена во моделот на однесување на Русија. Ако без никакви позитивни промени во однесувањето на Русија, почнеме да се ангажираме, тоа ќе испрати многу несигурни и лоши сигнали до нашите партнери, на пример, земјите од Источно партнерство. Ми се чини како да се обидуваме да ја ангажираме мечката да го чува безбеден делот со медот, изјави литванскиот претседател Гитанас Науседа.
ДПА пренесе изјава на холандскиот премиер Марк Руте во која вели дека иако во принцип не е против, сепак тој нема да присуствува на состанок за директен ангажман со Русија.