По две недели континуиран раст на заразени со ковид-19, кривата се исправа, а значително е зголемен интересот за вакцинација кај граѓаните. Невакцинирани од новозаразените со ковид-19 се 85 отсто и 91 процент од хоспитализираните.
Вчера се регистрирани 1.074 нови случаи на ковид-19 од 7.571 тестирање, додека починаа 24 лица. Најлоши 24 часа од почетокот на пандемијата имаше ковид-центарот во Тетово со девет починати и 18 хоспитализирани пациенти, а поради сериозни компликации од повеќе хронични болести, дел од нив биле однесени во Скопје.
Вкупната бројка на ковид дијагностицирани лица во нашата земја од почетокот на епидемијата изнесува 166.741, на оздравени пациенти е 151.692, на починати е 5.632, а бројот на активни случаи изнесува 9.417.
Според податоците на Министерството за здравство (МЗ), вакцинирани се вкупно 638.428 граѓани, а ревакцинирани 495.803 лица, односно аплицирани се вкупно 1.134.231 милиони дози на вакцини.
Прва доза на вакцина завчера примиле 13.275 граѓани, а вкупно се вакцинирале 17.623 граѓани. Со последните бројки, барем една доза на вакцина примиле 70 отсто од населението над 70 години, 67 проценти од луѓето над 65 години, 63 отсто над 60 години и 53 отсто од населението над 50 години.
Од МЗ апелираат за масовно вакцинирање за спречување на тешка форма на болеста и намалување на ризикот од заболување и смртен исход. Притоа потсетуваат дека за вакцинирање не е потребно закажување кое важи само за малолетници од 12 до 17 години кои треба да бидат пријавени за термин на веб-страницата vakcinacija.mk.
Според двонеделната анализа на МЗ, од позитивните на ковид-19 на територијата на државата, 1.507 биле целосно вакцинирани (со две дози) или само 15 проценти.
Голем е бројот на невакцинирани граѓани кои се заразиле со ковид-19. Според двонеделната статистика, 8.374 од позитивните лица не биле вакцинирани. Процентот на хоспитализирани лица кои се невакцинирани изнесува 91, додека само девет отсто од сите 724 моментно хоспитализирани пациенти се целосно вакцинирани. Во период од две седмици, на територија на државата починало 101 лице од кои 92 не биле вакцинирани, а само девет лица имале примено вакцина. Според анализите, починатите имале повеќе хронични заболувања, наведува Министерството.
Во анализата за вакцинирани се сметаат лицата вакцинирани со две дози, кои поминале најмалку 14 дена од примање на втора доза.