Претседателот на Европската народна партија, најголемата парламентарна група во Европскиот Парламент, Жозеп Дол, во изјава за „Еуроактив“ оцени дека вчерашната средба на премиерите на Македонија и Грција, Зоран Заев и Алексис Ципрас, во Давос, претставува „прозорец на можности“ за решавање на долгогодишниот спор за името.
-Се надевам дека ќе се најде заедничко прифатливо решение и ние го поздравуваме овој прозорец на можности што може да доведе до конкретни резултати, вели Дол.
„Еуроактив“ сепак нагласува дека ставот на првиот човек на ЕПП е во спротивност со позицијата на нејзината членка – најголемата грчка опозициска партија Нова демократија, која се противи на начинот на кој грчката Влада ги води преговорите за името на Македонија.
Курт Вокер, поранешниот амбасадор на САД во НАТО, кој сега е вклучен во решавање на конфликтот во Украина, смета дека Русија веројатно сега че се обиде да го запре приклучувањето на Македонија во Алијансата.
Тој притоа го посочува примерот со неуспешниот обид за државен удар во Црна Гора во 2016 година, што според него покажува дека Москва е подготвена да преземе дејства дури и кога тој процес е во подоцнежна фаза.
-Не сум сигурен колку може да се каже дека Русија ќе се согласи за приклучување на Македонија кон НАТО. Имајќи ги предвид сите овие работи, мислам дека тие ќе дејствуваат опортунистички, вели Вокер.
Тој смета дека решавањето на спорот за името меѓу Македонија и Грција ќе доведе до голема стабилизација на Западен Балкан.
– Секако дека сакам да видам напредок во решавањето на спорот со името. Тоа ќе биде во интерес на двете земји. Верувам дека има надеж и оти ќе видиме напредок, нагласи Вокер.