Фудбалската вест на денот надвор од Светското првенство во Русија доаѓа од Мадрид. Претседателот на Реал, Флорентино Перез и официјално се обрати до ПСЖ за услугите на Нејмар за кого, според шпанската национална телевизија (ТВЕ), е подготвен да плати рекордни 310 милиони евра. И досегашниот трансфер рекорд е во сопственост на Бразилецот кој лани од Барселона се пресели во Градот на светлината за сума од 222 милиона евра. Одговор од Париз засега нема.
Она што е познато, исто така, е расположението на управата на „кралевите“ да понуди седумгодишен договор на Нејмар според кој репрезентативецот на „кариоките“ би заработувал 45 милиони евра на „Сантијаго Бернабеу“.
Евентуална реализација на зделката ќе значи и дефинитивно заминување на Кристијано Роналдо од Реал Мадрид за што доста се шпекулира овие денови. Се понагласено се споменува Јувентус како можна идна дестинација на Португалецот, а сега во опција, според медиумите, влегува и ПСЖ како замена на Нејмар.